WILLEMSTAD- Inskripshon pa HOPE Softball Tournament 2016, e torneo renombrá di softball slowpitch soshal komersial, a habri. Atletanan di SOAB konhuntamente ku e Asosashon di Aktividatnan Soshal, ACZHON ya ta den full swing ku preparashon pa HOPE Softball Tournament 2016 i a kuminsá sinti e entusiasmo di varios kompanía. Esaki ta un di e motibunan ku nos ta urgi tur kompanía ku ta deseá na partisipá na e torneao aki pa hasi esaki mas lihé ku ta posibel. Kompaníanan ku kier forma parti di HOPE Softball Tournament 2016 por inskribí via di e e-mail adrès hope@soab.cw o e website www.hopetournament.com i hasi menshon di e nòmber di e kompanía, nòmber di e persona di kontakto, number di telefòn i e-mail di e persona di kontakto di e kompanía. Tambe bo por indiká mesora den kua kategoría e kompanía ta deseá na inskribí p’é.

E kategorianan ta :

• Femenino Soshal (konsistiendo di un máksimo di 3 hungadó aktivo)
• Maskulino Soshal (konsistiendo di un máksimo di 3 hungadó aktivo),
• Maskulino Challenger (konsistiendo di un máksimo di 6 hungadó aktivo)
• Maskulino/Femenino Kombiná COED (konsistiendo di un mínimo di

4 damas i 4 kabayero i un máksimo di 3 hungadó aktivo).

Otro informashon importante :

• Tur hungadó mester ta empleado di e kompanía i tin un edat mínimo di 18 aña.
• Bo partisipashon ta bira definitivo na e momento ku bo kompanía paga e suma di inskripshon i entregá lista di hungadonan ku firma i stèmpel di kompanía. Si bo no kumpli ku un di e kondishonan aki, bo inskripshon lo NO ta bálido.
• HOPE Softball Tournament 2016  ta start djabièrnè 18 Mart i lo terminá djadumingo 24 Aprel.
• Tereno: Suvek Ballpark
• Dianan di wega : djabièrnè, djasabra i djadumingu
• Riba 24 Febrüari pa 18:30 riba patio di SOAB na Scharlooweg 174 lo tin un seshon di informashon pa tur tim partisipante.

Pa mas informashon por tuma kontakto ku Sandra Fokke o Junice Augusta na 466-9000.