Durante ultimo fin di siman aproximadamente  8000 bishitante a goza di tremendo musica, ambiente, obra di arte y cuminda suculento na e di 7 edicion di Caribbean Sea Jazz Festival Aruba. E Festival mustra di ta crece cada aña. Aña pasa e organisacion a conta 6500 bishitante y e aña aki, cu su localidad nobo na Renaissance e festival a crece cu 1500 persona mas. Diabierna anochi e publico presente a sa di baila for di comienso te final cu e legendario grupo di salsa El Gran Combo de Puerto Rico. Na dado momento nan a invita Robert Jeandor pa subi y canta un cancion cual a cay hopi na agrado di e publico. Willy Garcia y su orquesta despues di un tiki contratiempo cu awasero a sa di pone e salseronan riba pia cu su exitonan clasico. Locual a resalta riba diasabra anochi tabata e legendario George Benson. E la toca tur su exitonan manera “On Broadway” y ‘Give me the night’. Tambe el a expresa cu e tabata contento di a regresa y ta feliz di por disfruta di Aruba. E ta haya nos isla hopi bunita y nos hendenan masha agradabel. Na e Divi Stage e grupo Colombiano Gualao a toca cu hopi energia y publico a contesta cu alegria y baile. Den Renaissance Convention Center, artistanan local manera Ivan Jansen y The Groovehunters for di nos isla ruman Corsou a presenta cu hopi animo y amor pa musica di jazz.  Jose James, e talentoso cantante for di Merca, a cera anochi na Padu Main Stage cu Padu Lampe su mes sinta mei mei den publico. Paul Gielen, General Manager di Renaissance Aruba y tambe Erik Jan Eman, director  di Purple Entertainment Group y organisado di e Caribbean Sea Jazz Festival, a expresa cu nan tabata hopi contento di mira asina hopi hende disfruta nan mes riba tereno nobo di festival e aña aki. E food court cu 9 restaurant local a bende hopi mas cuminda cu nan a calcula; e prome anochi nan tabata ‘sold out’ y riba Diasabra nan a bende mas cu diabierna. Tur e doño di e restaurantnan tabata masha contento y e bishitantenan a disfruta di e dushi cuminda na mesa estilo di ‘pick nick’ mei mei di e Food Court. Tambe e Art Galery den Renaissance Convention Center a haña mas exito cu nunca – for di e 40 obra di arte nan a bende 13 obra, un ‘all time record’ den historia di e jazz festival. Michiko Takatsu di TAG 165 a expresa cu el a wordo sorprendi completamente cu e gran exito e aña aki. “Nos ta sumamente contento cu e art show na e Caribbean Sea Jazz Festival na Renaissance”, el a bisa. Resumiendo nos por mira cu e Caribbean Sea Jazz Festival 2013 tabata un exito rotundo!