WILLEMSTAD, 19 di yanüari 2016 – Riba 14 di yanüari último JCI IOBA Curaçao a instalá su direktiva nobo pa e aña 2016. Ta trata aki di un direktiva di sinku profeshonal hoben i aktivo ku e ambishon i gana pa sigui sirbi nos komunidat. Den  luna di òktober 2015 miembronan di e JCI IOBA Curaçao a elegí e direktiva aki, ku mesora a kuminsa ku preparashonnan pa asina por guia e organisashon den 2016.

Pa por haña un mihó bista riba e areanan ku mester di atenshon den nos komunidat JCI IOBA Curaçao a lansa e programa di ‘Investigashon i Desaroyo’ na 2015. Konforme resultado di Fase II di e programa aki, a konkluí ku ‘edukashon’ ta un kousa di prekupashon den nos komunidat ku meresé más atenshon. Pa e motibu aki e organisashon i su direktiva nobo ta bai enfoká prinsipalmente riba proyekto nan relashoná ku ‘edukashon’ durante e aña 2016.

JCI IOBA Curaçao su direktiva di 2016 ta konsistí di Sueena Francisco komo Presidente, Milagros Blanken- Rodriguez Navarro komo Presidente Saliente, Emschka Johannes komo Vise Presidente, Genesis Martis komo Sekretaria i Sulin Passial komo Tesorero.

Pa 2016 JCI IOBA Curaçao su lema ta: ‘Simplicity, Strength and Support.’ Ku esaki e organisashon lo sigui enfoká riba krea kolaborashon duradero ku kompania i organisashon ku ta komparti mesun vishon ku e organisashon, kaminda miembronan di JCI IOBA Curaçao por ofresé un balor agregá na e partnernan i vise vèrsa. Huntu nos por logra muchu más pa un miho Kòrsou.

JCI IOBA (Involvement of Banda Ariba) Curaçao ta un organisashon lokal ku ta afiliá na Junior Chamber International (JCI). JCI ta e federashon mundial di lidernan entre 18 pa 40 aña ku ta dediká na trese kambio positivo den nos komunidat. JCI IOBA Curaçao huntu ku ocho otro kapítulonan den nos región, anteriormente “Antias Ulandes”, konhuntamente ta forma parti di JCI Dutch Caribbean.

Pa mas informashon tokante JCI IOBA Curaçao por bishitá nos wèpsait www.jci.cc/local/ioba òf bishitá e página di Facebook di JCI IOBA Curaçao.