WILLEMSTAD – Ehekutivonan di Renaissance Resort Curaçao & Casino a yama bon bini na e popular komediante, presentador i aktor Jandino Asporaat ku tabata na Kòrsou fin di siman tras di lomba enkonekshon ku estreno di su pelíkula “Bon Bini Holland”. Tabata djadumingu último ku The Cinemas a tene un anochi di estreno pa e pelíkula “Bon Bini Holland” ku a debutá den Tòp 10 durante su siman di introdukshon na Hulanda i protagonisá pa e propio Jandino Asporaat.

Jandino a yega Kòrsou djasabra último pa ayera djadumingu e presentá na estreno di e pelíkula. Asporaat, tabata anfitrion di fanatikonan aki na Kòrsou ku a akudí na gran kantidat pa e nochi di estreno na The Cinemas ku a inkluí un ‘Meet & Greet’ eksklusivo ku e komediante yu di Kòrsou. E pelíkula mes, ta konta di un hóben yu di Kòrsou i su aventuranan- durante un di nan e ta wòrdu mandá Hulanda pa bai biba serka su tanchi Judeska. Na final, un lès balioso pa kualke hóben ku ta deseá di ta eksitoso den su bida. Aki ta konsiderá Jandino mes komo ehèmpel di un ‘YDK’ ku a yega hopi leu den su karera te ku awor e ta konsiderá komo un tòp komediante na Hulanda. Renaissance Resort Curaçao & Casino ta masha orguyoso di por tabata hotèl anfitrion pa Jandino i ta spera ku su estadia tabata unu memorabel.