Willemstad 18 yanüari 2016 – UTS a tuma nota di rumornan persistente di mas kanal di televishon na Kòrsou ku lo ta interesá pa transmití Festival di Tumba 2016. Relashoná ku esaki, UTS a manda un proposishon pa tur kanal di televishon di Kòrsou i mester bisa ku tin kòmbersashonnan andando den bon esfera pa mas kanal por transmití e anochi final di festival di tumba, kual ta djabièrnè 22 di yanüari 2016.

UTS ke enfatisá ku sí yega na un akuerdo di transmishon ku demas kanal(nan) di Kòrsou pa transmishon, esaki ta solamente p’e anochi final, pues djabièrnè 22 di yanüari 2016 i solamente pa Kòrsou via di señal habrí òf manera ta ser bisá den boka di pueblo, via di antène.

E dianan preliminar di festival di tumba lo ta optenibel manera kustumber pa Kòrsou i Boneiru únikamente via di Pay per View di TDS i internashonalmente únikamente via di ‘Live Streaming’ di TeleCuraçao.

Pa loke ta trata Aruba, por haña e Pay per View via di SETAR CABLE, pa St. Maarten via Wireless Tele Communication NV i Boneiru via TDS, TELBO i Flamingo Cable.

Pues pa ta bon kla, ni kanalnan lokal, ni RTV7, ni kanalnan di Aruba, Boneiru i St. Maarten lo no transmití e anochinan preliminar di Festival di Tumba 2016. Festival di Tumba lo NO ta aksesibel via provedornan lokal manera FLOW òf TRES. Tur kompania internashonal, inkluso FLOW i TRES, lo no risibí imágennan bibu di e anochi final for di TeleCuraçao òf otro kanalnan di televishon ku por tin e derecho di transmití.

Pa pidi pa bo Pay per View via TDS, mester yama 9242 òf mandando un SMS for di (eksklusivamente) bo Chippie na 8585, menshonando: 1. bo Fam, 2. bo number di kuenta di TDS i 3. e palabra ‘TUMBA’.

Pa ‘live streaming’, pidi bo PPV via di e website di TeleCuraçao, e TCFM App òf Roku. Por registrá i paga ku’ credit card’ via di e website di TeleCuraçao  www.telecuracao.com. P’esnan na Hulanda ku ke paga ku ‘Ideal’, por registrá via di e site di Basilachill (www.basilachill.com) pa 80 Euro. Durante oranan di ofisina por registrá tambe na TeleCuraçao pa Ang 140.