Sigmund Kock a cumpra un pasashi y a gana un otro pa Santo Domingo

ORANJESTAD, Aruba – 18 di januari 2016: Aruba Airlines ta hopi contento cu e acogida di parti di comunidad pa cu nan di dos shopping night, cual a tuma luga siman pasa. Tur nuebe mesa di benta tabata ocupa for di tempran y gerencia a dicidi hasta di extende e orario pasa di 11or di anochi pa asina acomoda tur cliente. Gerencia y e personal completo di Aruba Airlines ta gradici comunidad di Aruba pa scoge Aruba Airlines y pone nan confiansa den e aerolinea cu ta ofreciendo actualmente vuelonan pa Corsou, Santo Domingo, Valencia, Maracaibo, Panama y Miami.

Loke tabata special di e di dos shopping night tabata cu Aruba Airlines no a pone un cierto cantidad di pasashi so disponibel na un cierto prijs special, pero a duna 20% “across the board” riba tur ticket. E sorpresa mas grandi di e anochi a yega apenas un rato cortico despues cu a cuminsa atende clientenan, ora cu gerencia a dicidi di extende e periodo pa biaha te cu september 2016.

Representante di Benta pa Aruba Airlines, Jessica Dirksz a splica cu originalmente a publica e fechanan pa biaha di 15 di januari pa 15 di mei, 2016, pero mirando cu tabatin clientenan cu kier a cumpra nan ticketnan pa otro periodonan tambe, incluyendo vakantie grandi, a dicidi di biaha pa extende e periodo di descuento te cu september 2016.

Clientenan cu kier bishita Corsou pa e final di Festival di Tumba tambe a probecha pa cumpra nan ticket di un anochi, pues yegando Corsou diabierna atardi y saliendo bek pa Aruba diasabra mainta.

E shopping night a bay ‘tremendamente bon”, segun Director di Aruba Airlines, esta Onno de Swart. El a bisa cu adicional na e rutanan ya caba popular, e aerolinea ta trahando riba e rutanan Aruba-Bogota, Colombia, Aruba-Quito, Ecuador y Aruba-Newark, New Jersey. E ruta Aruba-Bogota ta esun cu ta mustrando di bay keda cla mas lihe. Tin un otro destinacion cu gerencia ta trahando riba dje, pero Onno de Swart a prefera di mantene esaki un sorpresa “por lo pronto”.

E di dos shopping night di Aruba Airlines a bay den un ambiente excelente, y a inclui bon musica “live” cu D’Vibe, BWM y ‘N Fuzion, snacks y bebida.

Na final di anochi Aruba Airlines a rifa un pasashi ida-y-vuelta pa Santo Domingo, Republica Dominicana entre tur esunnan cu a cumpra un pasashi. Sigmund Kock a resulta e feliz ganado.

Ademas, durante di e evento aki, hunto cu e grupo di Carnaval TOB, a efectua e sorteo di e rifa di un pasashi ida-y-vuelta pa Miami entre tur persona cu a inscribi pa bay parada cu e grupo aki. TOB a patrocina e premio cu a wordo gana pa Elvis Rodriguez.

Onno de Swart a finalisa bisando cu e forma con pueblo di Aruba a responde na e Shopping Night ta un señal pa e compania cu esaki no por ta e ultimo actividad special di su tipo pa e aerolinea aki. Gerencia y Personal di Aruba Airlines ta gradici comunidad di Aruba pa pone nan confiansa den Aruba Airlines.

A funda Aruba Airlines dia 31 di januari 2006 pero a realisa su prome vuelo dia 31 di mei 2013. E compania Arubiano tin su oficina principal situa na Cumana 69 aki na Aruba pero cu oficinanan di representacion na Panama, Miami, Venezuela y awor na Corsou y Santo Domingo tambe. Aruba Airlines ta bula cu avionnan nobo y moderno Airbus A 320-200 cu un capacidad di 150 pasahero, parti den 12 pasahero Business Class y 138 den Economy Class. Nan tin un total di 300 empleado staciona na tur nan oficinanan den tur nan mercadonan. Na Aruba so tin 139 empleado den servicio directo.