15 Yanüari, 2015 Willemstad – Ministerio di Desaroyo Ekonómiko (MEO) a organisá huntu ku Startup Curacao, Curaçao Innovation and Technology Institute (CITI) i Universidat di Kòrsou (UoC) djamars 12 di Yanüari, un anochi di informashon tokante e programa Erasmus na Workspot Curacao na Scharloo.

E programa ta un interkambio di konosementu entre paisnan di Europa, inisiá i finansiá pa Union Europeo. Den un periodo definí, un empresario ku ménos ku 3 aña di eksistensia, tin e chèns pa siña for di eksperiensha di otro empresario den un otro pais. E paisnan partisipante ta tur e paisnan miembro di Union Europeo. Kòrsou komo parti di Reino Hulandes, tambe por partisipá. “E programa ta brinda e posibilidat di traha den un forma paresido na un “stazje”, asina e empresario por siña trahando huntu den e proseso empresarial”, segun Fiona Curie, manager di Inovashon na MEO.

Ounke e programa tin un algun aña kaba, nunka ainda Kòrsou no a yega na partisipá ku empresario ku ta risibí konosementu òf ku empresario guiadó. Startup Curacao, Workspot Curaçao ke mira mas interkambio di konosementu i rekurso entre empresarionan, asina huntu por siña i resolvé retonan ku mayoria empresarionan ta enfrentá. P’esei huntu ku CITI i UoC , nan ta duna sosten na MEO pa informá e sektor di insentivonan ku tin.

E anochi tabata ameno, tabata tin chèns pa e empresarionan interkambiá ku otro y tambe haña un training kòrtiku di Richard Martina, lektor na UoC, tokante e aspektonan importante ku un plan di negoshi tin ku kontené.

Por apliká pa e programa di Erasmus hinter aña. Pa mas informashon por tuma kontakto ku Fiona Curie (MEO) na tel: 462-1444 ext. 134 òf mail: Fiona.curie@gobiernu.cw. Pa keda na altura di charla i evento pa empresario bishita i “like” e página di Facebook: Startup Curacao