WILLEMSTAD – Awor ku e huma di polbu di e klapchinan a disparsé, por pidi atenshon atrobe pa otro asuntu importante den bida. Entre nan ta konta tambe e oportunidat pa esnan deportivo duna un man na benefisio di un bon kousa, esta e lucha kontra kanser. Riba e website di Fundashon Ride for the Roses (www.ridefortheroses.net) entrante awe (djaluna 11 di yanüari) a habri Inskripshon pa partisipá na e di 12 edishon di Ride, Sail, Swim & Walk for the Roses riba djadumingu dia 24 di yanüari awor.

E aña aki e fundashon por konta ku respaldo i koperashon atrobe di Orco Bank komo spònser prinsipal, Fundashon Bon Intenshon, Curaçao Port Services, Guardian Group, Gillette i Curoil komo spònsernan platinum i ademas un kantidat grandi di kopatrosinador apresiá mes tantu.

Dia 7 di novèmber último e preludio a tuma lugá: Uphill Challenge ku nan a hala dilanti pa motibu di e agènda yen e luna aki. Sinembargo, awor e kos grandi mes ta riba programa pa kua ta antisipá atrobe alrededor di 10 mil hende ku tur ta duna nan kontribushon pa rekoudá fondo pa Fundo (di kanser) Prinsesa Wilhelmina (PWF). Di forma rekreativo por kore, kana, kore baiskel òf landa, miéntras por bai ku boto di bela tambe. E koredor i kanadónan ta sali for di tempran (7 or) for di Awasá; nan por krusa via brùg di ponton òf esun haltu pa bai Skalo i Punda pa atraves di Pietermaai i Mari Pompun finalisá na Curaçao Seaquarium. Pa koredornan di baiskel a traha diferente ruta ku ta kuminsá i finalisá na Seaquarium; nan ta kuminsá 8 or di mainta. Pa esnan ku gusta bai den boto di bela a traha un skema ku ta resultá den un bunita show riba laman. Kuminsamentu di esei ta 11 or for di e klup di deporte akuátiko Jan Sofat na Brakapoti. Diesdos or di mèrdia e gira di landadónan ta kuminsá na Zanzibar na bahia di Jan Thiel pa kaba na Seaquarium. Aparte di esei tin tambe e oportunidat entre 8 or di mainta i 12 or di mèrdia pa gruponan partisipá na Spinergy den e etablisementu nobo Madero na Boulevard (antes Mambo Beach); esei ta pa grupo di kolega òf amigu kubri mas tantu kilometer posibel riba hometrainer pa e meta noble.

Inskripshon

Lòs di e posibilidat pa inskribí online ta posibel tambe pa inskribí, paga i buska flanèl for di djaluna 18 di yanüari te i ku djabièrnè 22 di yanüari di 08:30 or di mainta pa 03:30 di atardi na e spònser prinsipal Orco Bank na Lanthùis Cerrito (Schottegatweg Oost s/n). Aya por haña informashon tambe riba otro asuntu, manera ruta, orario i demas. Djasabra 23 di yanüari por inskribí ainda for di 09:00 or mainta te 04:00 or di atardi na Orco Bank. Mas detaye por haña tambe riba e website: www.ridefortheroses.net.