Beisbolista honra cu su nomber riba Wall of Fame

ORANJESTAD, Aruba – 11 di januari 2016: E hungado di baseball Arubano, kende ta biba na Hulanda, Adonis Kemp, ta na Aruba cu vakantie y hunto cu su famia a bishita Joe Laveist Sport Park riba diabierna.  El a keda impresiona y encanta cu e resultadonan di e transformacion di Joe Laveist Sport Park, cual recientemente a wordo inaugura despues di trabaonan extenso di renobacion y mehoracion.

Representando e comision encarga cu Joe Laveist Sport Park y den nomber di Minister di Deporte, dr. Alex Schwengle, Veroushka Croes a ricibi Adonis Kemp, su casa Susan Kemp-Chung y nan tres yiunan pa un recorido di e facilidadnan.

Tabata un momento hopi special pa Adonis mira su nomber riba e Wall of Fame, hunto cu tur e otro hungadonan di baseball local, kende a destaca localmente, como tambe esunnan cu a pone Aruba riba mapa den e mundo di baseball internacionalmente. E hungadonan cu nan nombernan ta riba e Wall of Fame tur a hunga y/of entrena den un of otro etapa di nan carera na Joe Laveist Sport Park.

Famia Kemp ta di bishita na Aruba pa vakantie y lo bolbe Hulanda e siman aki y un di e cosnan cu nan a pone riba nan lista di “must do” tabata un bishita na e facilidadnan di baseball y a conoce un expansion pa acomoda otro deporte y actividadnan.

Adonis a expresa cu e ta hay’e un bon inicitiava pa trece deporte bek den comunidad y ta spera cu e parke di baseball yuda produci mas atletanan cu careranan grandi.

Adonis Kemp ta un di e atletanan di Aruba kende a destaca na Hulanda den e deporte di baseball. Actualmente e ta tumando un “break” di dos aña y ta splica cu asina e tin mas tempo pa dedica na su tres yiu hombernan kende ta siguiendo den su pasonan y ta haciendo un nomber pa nan mes den e deporte di baseball na Hulanda. Tyriq Kemp (13) a ricibi e titulo di Best Hitter Little League Team Rotterdam na December 2015, Urving Kemp (22) ta un hungado den e liga mayor Hulandes (Dutch Major League) y Dwayne Kemp (27) a hunga pa Chicago Cubs organization.

Rudolph Adonis Kemp a hunga pa 15 aña den Dutch Major League y tabata miembro pa ocho aña di e seleccion nacional di Hulanda. Su yiu homber a hunga pa Chigaco Cubs organization y hunto cu su ruman Urving ta hunga pa e ekipo di Curaçao Neptunus, cu ta parti di e Dutch Major League.

Adonis Kemp, despues di un carera grandi na Hulanda, a bira coach y manager na Hulanda pa, entre otro, Neptunus. E ta e prome Arubano pa gradua como Top Sport Coach Level 4 pa e opleiding di e baseball bond Hulandes, esta KNBSB.

El a cuminsa su carera na Hulanda na 1987 na Sparta. Un aña despues el a hunga un temporada cu Feyenoord hunto cu otro hungadonan di Aruba, manera Elton Wilson y Haime y Farley Wiersma. El a bolbe Sparta pa dos temporada y despues, na 1991 a move pa ADO, unda cu el a hunga pa cuater temporada.
Na 1993, Adonis Kemp a bira miembro di e seleccion nacional di baseball y a hunga 48 torneo cu nan, incluyendo tres European Championships, dos Haarlem Baseball Week, dos World Port Tournament y un Intercontinental Cup.

Tabata cu hopi orguyo cu Aruba por a sigui e desaroyonan di Adonis riba e veld di Weganan Olimpico na 1994. E mesun aña Kemp a cu otro hungado riba e prome luga di e Liga Mayor di Hulanda cu 13 homerun y 47 careda.

Kemp tambe a contesta e yamada pa hunga internacionalmente pa Aruba durante di su carera na Hulanda. Na 1993 el a reenforsa Red Machine pa e World Port Tournament, hunto cu Pierre Richardson y Richard Orman, kende tambe tabata hungando na Hulanda. E ekipo di Aruba a tuma e di dos luga di e torneo aki, cual a wordo gana pa e USA Alumni Team, cu a consisti di algun di e miho hungadonan di Major League Baseball. Su desenbolbimento durante di e torneo aki tabata e yabi pa Kemp drenta e ekipo nacional di Hulanda.

Adonis Kemp su carera a inclui diferente reconocimento, incluyendo e titulo di Homerun King durante di un torneo internacional unda e cuater miho ekiponan Europeo a hunga pa e “Cup of the Cups” na Italia. Esaki tabata na 1994, tempo e tabata hungando cu ADO. El a ricibi e titulo di “Most Valuable Player” tambe durante di e Holland Series na 1995, unda cu el a score tres homerun. El a bira tambe e prome Arubano pa ricibi un medaya y certificado di participante di Weganan Olimpico.

Adonis Kemp a retira na 2002, despues di hunga 551 wega den e Liga Mayor di Hulanda y kedando den e top 15. El a keda na di dos luga, despues di e legendario Marcel Joost, cu 106 homerun den e 15 temporadanan regular cu el a hunga. Despues di retira for di Major League Hulandes, Kemp a sigui activo den baseball. El a siña coaching na e scol di baseball di Robert Eenhoorn na 2003 y a bira e head coach pa Neptunus farm team (DOOR Tridents) na 2005. Na 2006, el a lidera e ekipo den gana e titulo nacional den Prome Division. El a wordo contrata pa maneha Sparta/Feyennoord na 2007 y un aña despues Neptunus a trece bek como nan coach pa “first base, hitting y outfielder”.

Adonis Kemp ta un inspiracion no solamente pa su yiunan, kende ta sigui den su pasonan di exito den baseball, pero tambe pa cualkier hoben Arubano cu un amor pa baseball y cu gana di triunfa den e deporte aki.

Aruba ta orguyoso di su talentonan nacional y e renobacion di Joe Laveist Sport Park a ofrece e oportunidad perfecto pa crea un Wall of Fame pa honra, entre otro, Adonis Kemp. Poniendo e nombernan di e hungadonan estelar di Aruba unda cu tur hoben basebolista ta wak nan cada biaha cu nan bay train y hunga na Joe Laveist Sport Park ta un motivacion adicional pa nan keda cu  e ambicion y pone e esfuersonan necesario den nan deporte pa triunfa localmente y internacionalmente.