Djasabra 9 di yanüari 8:00 PM na Brionplein…..grátis!

WILLEMSTAD- Djasabra 9 di yanüari pa 8^or di anochi na Brionplein lo tuma lugá e homenahe na Anselmus “Boy” Dap titulá “Ai no chansa”. Fundashon Bon Intenshon (FBI) i Maduro & Curiel’s Bank a djòin otro i pone nan skouder bou di e bunita proyekto aki pa duna Boy Dap, mihó konosí komo e Tata di Tumba, loke e meresé. Boy Dap ta konosí pa ta aktivo den diferente temporada i diferente banda i orkesta, pero Boy ta muchu mas konosí den temporada di karnaval. Ta p’esei mes a skohe pa duna Boy e rekonosementu den e temporada aki. Na aña 2015 Fundashon Bon Intenshon a duna un homenahe na Don Macario Prudensia (Di felis memoria), komo un di nos baluartenan den músika Kurasoleño.  Despues ku vários persona a aserká FBI ku petishon pa hasi un homenahe na vários artista lokal, FBI a haña ku e momentu aki tur shimaruku ta hechu pa duna rekonosementu na nos Boy Dap.

25 aña pasá ku Bo Banko Amigu a selebrá su di 75 aniversario, MCB a organisá un anochi kultural i pone masha hopi di nos artistanan lokal den lus i asina mustra gratitut i apresio na nos artistanan. Pa loke ta selebrashon di 100 aniversario di Maduro & Curiel’s Bank den 2016, Bo Banko Amigu e biaha aki tampoko a spar energia pa bolbe mustra e apresio na nos artistanan lokal i di e manera aki gradisinan pa tur loke nan a nifiká pa nos komunidat, nos kultura, nos farándula i pa Maduro & Curiel’s Bank. E homenahe lo kuminsá 8^or di anochi en punto na Brionplein. Esaki ta un konsierto grátis pa tur hende por bin gosa di Boy Dap su merengue, guaracha, plena, bomba i wals ku e la yega di interpretá den pasado. Boso ta kòrda tumbanan super eksitoso manera “E Djaka”, “Dal’e kos”, “Bash’é”,“Un biaha mas”, “Sigui awor”, “Klabé” i hopi mas ? Tur e tumbanan aki di Boy Dap lo keda areglá den un bachi nobo pa diferente areglista lokal i di diferente edat.

Boy Dap su kansionnan lo keda interpretá pa vários kantante hóben p’asina huntu ku e kantantenan hóben aki nos yuda pasa e kansionnan di Boy Dap pa e siguiente generashonnan i alabes konsientisá nos komunidat di nos baluarte Boy Dap. Di e manera aki Fundashon Bon Intenshon i Maduro & Curiel’s Bank ta yuda tene e kansionnan di Boy Dap bibu pa hopi aña mas i pa hopi generashon mas por sigui disfrutá di nan. E orkesta lo ta bou di direkshon musikal di el maestro Gregory Colina i su amigunan. Un i tur ta bon biní na e konsierto titulá “Ai no chansa” ku por sierto ta título di un kansion masha konosí di Boy Dap. Tur loke bo mester kòrda hasi ta bini ku bo stul, si dado kaso bo ta deseá na sinta. Pa esnan ku pa un òf otro motibu no por yega Brionplein, e konsierto lo keda transmití bibu pa CBA Television, TeleCuraçao i algun radio lokal. Esaki no ta un chansa, pèrd’é pa bo pèrdè!