WILLEMSTAD – Ya na yüni 2015 a anunsiá ku SFT Bank NV i ‘Stichting Pensioenfonds’ Vidanova a firma un akuerdo di intenshon en konekshon ku un posibel aliansa stratégiko.

Resientemente SFT Bank i Vidanova a firma un akuerdo kaminda e dos organisashonnan a palabrá ku Vidanova ta tuma un parti supstansial di e akshonnan di SFT Bank. Mientrastantu Banko Sentral di Kòrsou i Sint Maarten a aprobá e akuerdo definitivo. Vidanova lo disponé di 2/3 parti di e akshonnan di SFT Bank i e organisashonnan ta anhelá un koperashon fruktífero ku lo hasi ámbos organisashon mas fuerte. Vidanova, lantá na 1968, pa 30 di sèptèmber 2015 tabatin 4975 miembro, 61 dunadó di trabou di kompania i instansia afiliá, 8 empleado i un kapital total di ANG 821 mion. E fundashon di penshun tin miembro i organisashonnan di dunadó di trabou afiliá na Kòrsou, Boneiru, Aruba, Sint Maarten, Saba i Sint Eustatius. SFT Bank, lantá na 1980, tin 55 kolaborador den servisio, un balansa total di 482 mion i ta establesé na Kòrsou. Formando aliansanan stratégiko Vidanova ta trata na brinda su miembronan tur sorto di servisio i produkto finansiero posibel ku nan mester di dje durante nan bida. Ku e aliansa aki SFT Bank ta haña un partner finansieramente poderoso pa e banko por sigui krese i pa por hisa e surtido di produkto i dunamentu di servisio un nivel mas haltu ainda. E aliansa aki lo no tin kambio komo konsekuensia, ni pa gerensia i personal di SFT Bank, ni pa gerensia i personal di Fundashon Fondo di Penshun Vidanova. E konvenio ta drenta na vigor entrante dia 1 di yanüari 2016.