Willemstad-  Kòrsou a haña un oportunidat úniko pa haña un bon bista riba e mihó práktika i aserkamentu tokante sistema di penshun kapitalisá individual ora ku Fondo di Penshun Vidanova a organisá un seminario ku e lema “From Pay-As- You-Go to Privately Managed: the Future of Our Pension System.”   E seminario ku a konta ku un bon partisipashon for di nos komunidat a keda apertura pa Minister Presidente di Kòrsou, sr. Ivar Asjes i a konta ku presentashon di e ekspertonan for di region i Ulanda. E seminario a keda organisá na okashon di selebrashon di e 45 aña di Fondo di Penshun Vidanova.  Durante di e seminario vários eksperto internashonal a kompartí nan eksperensha i konosementu tokante di e tema importante aki.  E seminario a keda organisá na vispera di introdukshon di reformanan ku nos pais no ta skapa di implementá den un futuro hopi serkano.  Presentadonan internashonal di taya ku a duna nan presentashon tabata:

• Sr. Santiago Montenegro Truijillo; Presidente di Asociación Colombiana de Administradoras de Fondos de Pensiones y Cesantias i un èks-Minister di Planifikashon di Colombia;
• Sr. Guillermo Arthur Errázuris; e Presidente di Asociacion de Administradoras de Fondos Provisionales de Chile i e tambe un èks-Minister di Labor di Chile;
• Sra. Kirsis Jaquez Marichal; kende ta presidente ehekutivo di e asosiashon di atministradónan di penshun di Repúblika Dominikana i representante di Repúblika Dominikana den International Federation of Pension Fund Administrators;
• Sr. Martin Pikaart; un konsultant riba tereno di penshun,  kofundador di “altenatief voor Vakbond” na Ulanda i outor di e buki “The Pensioenmythe.”

Sr. Rafeal Pichardo, Direktor ehekutivo di Vidanvova a kompletá e oradónan aki ku su presentashon riba e situashon ku Kòrsou ta aden i e perspektivanan pa loke ta trata e reformanan den nos sistema di penshun.  E seminario a keda konkluí pa un diskushon den pènel kaminda por a profundisá mas tantu riba preguntanan ku tabata biba bou di esnan ku a asistí na e seminario. Fondo di Vidanova ta mira tras riba un eksitoso seminario i ta spera ku e konosementu atkerí lo kontribuí na e tomo di desishon tokante di e tópiko importante aki i su introdukshon. Vidanova e mihó opshon pa penshun