Recuperacion di sitio historico y di recreo na Santa Cruz

ORANJESTAD, Aruba – December 2015: Riba dia 9 di december, Digicel hunto cu Serlimar y Team Estrella a yuda haci un limpiesa grandi na e sitio historico Ser’i Noka. E sitio ta conoci como un luga di recreo, unda cu a presenta diferente obra teatral cu temanan religioso den pasado. Ser’i Noka tin un luga special den curason di parokianonan di e Misa di Santa Cruz, como tambe e comunidad di Aruba en general cu na varios ocasion a sa di reuni aki pa disfruta di un bunita obra teatral.

A construi Ser’i Noka pa e celebracion di 100 aña di e parokia di Santa Cruz. E construccion tabata bou supervision di Nadi Croes, kende tabata traha cu DOW. E sitio a keda inaugura cu e obra teatral “Maria di Ser’i Noka”, cu a bira un obra masha popular. E grupo teatral Mascaruba tabata esun encarga pa duna e obra aki bida den e teatro di aire liber cu su bunita cruz grandi di piedra.

Stichting Parochi Raad despues a cumpra e teatro, unda cu a organisa hopi actividad, manera presentacionnan di “Pasion di Cristo” y Grupo Ambiente di Pasco y homenahe na honor di Betico Croes (qepd). Ser’i Noka ta un area importante, tanto historicamente, como pa cu presentacionnan di obranan teatral y diferente grupo musical.

Gerencia y personal di Digicel ta haya importante pa Ser’i Noka ta den bon condicion y a haci’e un prioridad pa e compania pa duna bek na e comunidad di Santa Cruz y di Aruba en general cu esfuersonan pa recupera y pone Ser’i Noka bek den su estado original, tempo cu e luga tabata masha bishita pa recreo y momentonan di reflexion. Digicel ta desea comunidad di Santa Cruz y tur nos ciudadanonan hopi momentonan special na e sitio bunita aki, cu awo atrobe ta bunita, limpi y accesibel pa tur esunnan cu ta desea di bishit’e.