Nafl 12.325,= a wòrdu ‘gará’ dor di un solo ganador:

WILLEMSTAD – Djasabra último a klousurá e kampaña ‘Shop & Grab’ di Renaissance Mall i Rif Fort. Manera ta e kaso di tur aña un kantidat hopi grandi di kupòn a keda depositá den e buzon; tur ku a depositá tabata tin chèns di por a drenta e ‘cash cube’. E ganadornan ku tabata tei presente a drenta mesora miéntras e otronan a wòrdu kontaktá pa risibí e bon notisia. Bou di supervishon di notario sr. Kleinmoedig a saka e 5 ganadornan for di e buzon. Nan a resultá Jennifer Zulia ku a gana 30 sekònde, Mei Yan Song- 25 sekònde, Sue-Ellen Quarton- 20 sekònde, Noëngela Rosina- 15 sekònde i finalmente Elsi Remedius Freitas Martinee ku a gana 10 sekònde. Tur ta risibí oportunidat di drenta den e ‘cash cube’, e kúbiko di glas ku ta wòrdu yená ku aire i plaka kèsh. E idea ta pa e ganadornan gara mas tantu sèn posibel miéntras e airu fuerte ta supla e plaka den e kúbiko.

Djasabra anochi, Jennifer Zulia a drenta e cash cube i a logra gara un total di Naf. 12.325,= den 30 sekònde, nèt su tras a drenta Sue-Ellen Quarton ku a logra gara Naf. 525,= den 20 sekònde. E ganadornan ku no tabata presente a wòrdu yamá i lo drenta e cash cube djarason awor 8’or den Carnaval Casino pa nan tambe purba gara mas tantu sèn ku ta posibel! Reakshon di esnan ku tabata presente tabata di hopi espektativa i e partisipantenan tambe por a sinti tenshon i suspenso. Di akuerdo ku representantenan di Renaissance Mall i Rif Fort esei ta eksaktamente e elementonan ku nan tabata ke.

Riba fotonan athuntu un impreshon di e momentu ku Jennifer Zulia i Sue-Ellen Quarton a drenta den e ‘cash cube’, ku músika di Dj Lu-C i ku animashon di tur ku tabata presente e damanan a pone man na obra! Masha Pabien na tur 5 ganador i éksito na esnan ku djarason lo drenta e cash cube.