Diadomingo awor muchanan por cuminsa inscribi Inscripcion lo dura te cu dia 15 di januari 2016
ORANJESTAD, 18 di December 2015 – ARUBA: Diadomingo awo, dia 20 di december, 2015, Garage Cordia lo habri inscripcion pa e “Toyota Dream Car art Contest”. Esaki ta den cuadro cu un evento special celebrando e di 50 aniversario di Garage Cordia Aruba, e agencia di autonan marca Toyota, Lexus, cuminsando for di 4’or di atardi pa 10’or di anochi den su showroom principal na Camacuri. Ta trata aki di un campaña nacional di pintamento, di cual muchanan entre 4 y 15 aña di edad lo por expresa nan creatividad artistico door di pinta nan mesun auto di nan soño, claro uzando tur nan imaginacion y incorpora aspectonan di nos dushi isla Aruba. E campaña lo start e mesun dia y lo sigui te cu dia 15 di februari 2016. Por inscribi te cu e fecha indica na Garage Cordia pa gana diferente premio. Muchanan lo haya chens di expone nan talento artistico tambe riba e pilarnan di Garage Cordia of cu e Street Painting cu lo tuma luga. Como premio mayor un biahe pa Hapon pa e mucha y un mayor.
Toyota Dream Car Art Contest ta un competencia internacional, caminda ta selecta un ganado for di Aruba pa nan dibuho. Esaki lo wordo manda pa Toyota, Hapon cu lo haci un seleccion di tur pintura ricibi for di mas cu 100 pais y lo haci un seleccion di 30 semi finalista (pais). Lo invita tur e 30 semi finalistanan (yiu y mayor) pa bay Hapon caminda cu un biaha mas nan lo competi pa e titulo di ganado absoluto. Fuera di e inscripcion pa e competencia grandi aki di pintura, lo bay tin un Movie Night pa e muchanan. Lo bay tin un bishita sorpresa door di un personahe masha stima pa e muchanan. Tambe Noord Carnival Group lo bay t’ey, y nan lo acepta inscripcion pa e diferente paradanan di Carnaval cu nan lo bay participa aden. Durante e evento di famia aki, Edselyn Figaroa lo bay t’ey, caminda cu e lo lansa su buki titula “365 storia pa mucha” .
Pa e evento di diadomingo awor, muchanan lo tin entretenimento di Dino Jump, pintamento di cara, popcorn dancers, chazz models, muchanan sabi, dancing divas, lo tin pintamento di caminda cu krijt, mag trece bicicleta pa core. Rotoract lo tey pa entretene muchanan cu weganan di antes. Garage Cordia lo ta completamente transforma pa un fiesta grandi pa nos mucha, hobennan y famia pa inspira creatividad di un y tur. E intencion ta pa mayornan trece nan yiunan y probecha pa nan inscribi pa varios grupo di deporte cu lo t’ey pa informa di nan actividadnan. Lo tin varios fundacion tambe pa conta di nan trabounan. Separa di muchanan, lo tin entretenimento pa adultonan tambe, den forma di presentacion di e bandanan musical Delicious, Tsunami, Abo So y Gaita Talentoso. Lo tin stand di cos di come y di bebe.
Pa cumpra carchi di entrada por check cu Fundacion Autismo Aruba, Garage Cordia, Edselyn Figaroa of na North Fantasy Group. Grandi y chikito ta cordialmente invita pa participa na e evento special aki, cuminsando for di 4’or di atardi te cu 10’or di anochi. Entrada general ta Afls. 5,- y tur contribucion lo bay pa Fundacion Autismo Aruba.