WILLEMSTAD- Djarason 16 di desèmber último, riba e fecha ku Maduro & Curiel’s Bank a kumpli 99 aña di eksistensia, Bo Banko Amigu a duna informashon na koleganan, prensa i komunidat ku nan lo kumplí nan di 100 aniversario dia 16 di dèsember 2016. Den kuadro di nan selebrashon rumbo pa 100 aniversario, Maduro & Curiel’s Bank a e ekspresá kon orguyoso nan ta ku nan logro i tambe a mustra nan apresio na nan empleadonan, klientenan i komunidat di Kòrsou. Bo Banko Amigu di un forma diferente a presentá e logo i lema di nan 100 aniversario i djingel titulá “Esaki si ta 100 100” ku a keda interpretá pa Farley Lourens i Heinrich “Richie Rich” Pieter. E lema di Maduro & Curiel’s Bank su 100 aniversario ta : “Entre pasado i futuro, MCB ta presente”.

Tambe tabatin presentashon di un banda formá pa koleganan di MCB, reforsá pa Arnel Salsbach ku a duna un tremendo presentashon. Durante e anochi aki MCB a presentá e programa di nan selebrashon den kual nan ta trata na kubri tur gremio di nos komunidat: for di muchanan ku ta bishitá Skol di Fundeshi te na e penshonado. Lo tin proyektonan i eventonan ku lo duna atenshon na edukashon, medio ambiente, trabou boluntario, empresa chikí, amigunan di prensa, deporte i nos kultura. E promé aktividat pa selebrashon di 100 aña di nos Banko Amigu lo tuma lugá djasabra 9 di yanüari na Brionplein. Na e aktividat aki MCB i Fundashon Bon Intenshon a uni i lo presentá e proyekto “Ai no Chansa” ku ta un homenahe na Anselmus “Boy” Dap. Mihó konosí komo Tata di Tumba i asina mustra apresio na artistanan lokal ku durante e 99 añanan tambe a kontribuí na engrandesé kultura i músika di Kòrsou.

Atenshon spesial lo keda duná na klientenan ku ta bishitá e 14 brènchnan, i klientenan ku ta hasi uso di nan tarheta di krédito, di fiansa personal i òf hipotek, di e seguro BSURE, rekargo di telefòn, Pagomátiko i Internet Banking durante aña 2016. E dekorashon ku lus blou i e señal spesial di 100 instalá parti pafó di algun brènch ta indiká kon orguyoso i agradesido Maduro & Curiel’s Bank ta ku nan ta rumbo pa 100 aniversario. Atenshon spesial lo keda duná tambe na parti paden di e brènchnan entrante yanüari 2016. Bo Banko Amigu lo mustra su apresio i gratitut na nan klientenan durante tur luna di aña 2016, tantu p’aden komo pafó di diferente brènch. Atenshon spesial lo keda duná na tur habitante di Kòrsou ku lo kumpli 100 aña na 2016, komo muestra di apresio ku ta e grandinan tambe a yuda ku awe nos Banko Amigu por ta asina orguyoso di ta rumbo pa 100 aña. Ademas tur kliente di Bo Banko Amigu ku ta kumpli aña 16 di desèmber 2016 lo risibí un regalito.

Maduro & Curiel’s Bank a klousurá e anochi di informashon hasiendo entrega di un chèk di donashon na 3 instansia i asina mustra nan responsabilidat den nos komunidat. Institutonan ku a risibí donashon e anochi aki ta: Bloedbank pa por kumpra un mashin T-ACE nobo; Quota Club International of Curaçao pa por sigui konsientisá komunidat di Kòrsou di e importansia di kuido di nos oido, spesialmente durante marchanan di karnaval; i Curaçaose Atletiek Bond ku Carifta Games 2017 inisiando den 2016 ku Dutch Caribbean Atletiek Series. Ta manera representantenan di Maduro & Curiel’s Bank a bisa: “Esaki ta un pi’e shen….. i nos ke sigui yama komunidat danki na nos manera”.

Al final Bo Banko Amigu for di awor a felisitá i gradisí empleadonan, komunidat di Kòrsou i klientenan pa nan konfiansa, loyaltat i sosten ku awe Bo Banko Amigu i di Konfiansa ta rumbo pa 100 aniversario.

Entre pasado i futuro, MCB ta presente.