WILLEMSTAD – Pa ta sigur ku tur e integrantenan ta na Kòrsou na ora pa ensayo i e konsiertonan di djadumingu i djaluna awor, e pianista Randal Corsen personalmente a bai risibí e tremendo kantante Yumarya Grijt djarason atardi na aeropuerto Hato. Djadumingu dia 20 i djaluna dia 21 di desèmber Randal Corsen & Friends ta presentá na Brakapoti Meimei ‘Paranda di Pasku 2’. Randal Corsen a skohe pa e perkushonistanan Pernell Saturnino, Eric Brigitha i Gino Samson, e basista Eric Calmes, e tokadó di kuarta Rhazul Sebelon i e trompetistanan Igort Rivas i Carlos Gonzalez i e kantantenan invitá ta Yumarya Grijt, Ñaño Rosario i Heinrich ‘Richie Rich’ Pieter. Yumarya so mester a bini di afó.

Karchinan na rason di 50 florin ta optenibel na Mensing’s Caminada, Albert Heijn i Bruna. Pa djaluna por haña karchi tambe na e ofisina di Fun Miles na rason di 30 florin mas 500 funmiles. E anochi ta kompletamente den ambiente di Pasku ku músika Karibense spesial di Kòrsou, Cuba, Aruba, Puerto Rico i Venezuela.

Loke por spera ta atrobe piesa konosí pa e periodo festivo aki di aña, hopi ritmo di folklor i baliabel ku hende por kanta samsam tambe. Algun di e piesanan di aña pasá pero ku algun piesa fresku i nobo. E estilonan musikal ku e músikonan lo basha riba e públiko ta varia di son, via chachacha, bolero, gaitas, parrandas te tumba i tambú pa di un forma apropiá selebrá Pasku, dispidí di 2015 i prepará pa e aña nobo ku perspektiva nobo.