ORANJESTAD, 17 DI DECEMBER 2015 – ARUBA: E muchanan di Imeldahof recientemente a goza di un actividad sumamente dibertido y fabuloso, unda cu Starbucks a uni cu Cuerpo Policial pa ofrece e muchanan un atardi di weganan di awa. Pa completa e ekipo ideal pa un actividad cu ta envolve awa, Brandweer tambe a asisti pa haci di e atardi un exito rotundo.
Chauffeurnan for di caminda grandi por a scucha e gritonan di alegria y harimento; e muchanan a hunga henter atardi y a disfruta di e snacks y cos di bebe cu gerencia y empleadonan di Starbucks a trece pa un dushi treat extra.
Jean Claude Geerman, kende ta un barista na Starbucks, a splica cu tur luna e compania ta organisa un actividad comunitario y ora cu el a wak e informacion tocante e relacion entre algun miembro di Cuerpo Policial cu Imeldahof, el a bin riba e idea cu un actividad aki lo ta un bunita gesto pa nan evento di fin di aña.
Geerman a tuma contacto cu Liliana Rasmijn, nan a reuni, haci un planning, y manera ta wordo bisa popularmente, “e resto ta historia”. E team combina di Starbucks, Cuerpo Policial y Brandweer no solamente a brinda un atardi agradabel na e muchanan, pero a pasa tambe hopi bon cu nan, supervisando nan durante e weganan pa tur cos cana netjes.
Supervisor di Starbucks, Clara Telo tambe a forma parti di e team organisador y e tabata contento di cu e compania unda e tin ya caba cuater añanan trahando por a trece un actividad asina alegre pa e muchanan.
Joanne Maduro kende ta un guia na Imeldahof a remarca cu nunca antes nan a haci un proyecto asina. Tabatin stagiaires cu a yega di haci un evento asina cu e muchanan, pero esaki ta prome biaha cu un compania a bin hunga e weganan di awa cu e muchanan. Segun Maduro esaki tabata un bon oportunidad pa e muchanan tambe tin contacto cu y ta socialmente bezig cu hendenan cu no sa bishita e cas usualmente.
Na final di e atardi ameno, Vocero Suplente di Cuerpo Policial, Liliana Rasmijn a keda hopi contento cu e bunita gesto di parti di Starbucks pa cu e muchanan cu e y su coleganan ta yuda brinda un guia extra.