A eligi Lilian Bislick como empleado di aña na Hospital

ORANJESTAD, Aruba – December 2015: Durante un anochi masha bunita unda cu casi 800 persona a bin hunto diasabra pa tene nan fiesta di fin di aña den Renaissance Convention Center, cual ya ta un tradicion pa basta aña caba. E aña aki, den un forma casi oficial, e empleadonan di Lands Laboratorium a join riba e anochi aki, mirando cu pronto nan tambe lo forma parti di e constelacion di Hospital. Director medico sr. Ezzard Cilié a habri e celebracion aki contando di tur e logronan di aña 2015 y alabes a conta un poco di loke por spera den e aña nobo.

Durante e anochi aki, no ta keda afo di scoge e empleado di aña, cual ta e anuncio cu tur hende tabata spera. Di acuerdo cu directiva di Hospital, e empleadonan di luna mag di promove nan mes entre e empleadonan, caminda cu nan ta busca nan voto y a base popular nan ta scoge e empleado di aña. Logicamente, esun cu mas voto, ta gana. Tur empleado ta haya chens pa deposita nan voto y despues di e conteo a resulta cu esaki e aña aki a keda den persona di Lilian “Lilly” Bislick di e departamento “Financiele Administratie”. Ta trata aki di un empleado hopi ehemplar, cu a ricibi apoyo di mayoria colega cu a vota.

Lilian tin 25 aña trahando na Hospital, unda cu el a ocupa diferente funcion den varios departamento manera “Magazijn” y “Debiteuren”. Unda cu Lilly a traha den Hospital semper nan a gust’e, e ta di berdad un persona hopi aprecia pa su coleganan y hefenan. E ta conoci como un persona super servicial, kende semper ta dispuesto pa yuda, y ta basta pa solamente indica algo cu un “half woord” y Lilly sa kico pa haci y con pa haci’e. Ademas, Lilly ta un persona skerpi, e ta incentiva otronan pa ta mas skerpi tambe, e ta un persona confiabel tanto cu cosnan di trabao como asuntonan personal y, basicamente, cun’e ta “what you see is what you get”.

Despues di e parti oficial aki tur hende a sigui disfruta e resto di anochi y a baila riba e musica di DJ Swingmastersz y tambe e banda popular di Robert Jeand’or y su Solo Banda Show unda cu e dansvloer a keda yen yen te na final di e gran celebracion aki.