Duna nos grandinan e regalo di mas bunita e dianan di fiesta aki: un bishita, amistad, atencion y compañerismo

ORANJESTAD , Aruba 15 December 2015 :E dianan di fiesta di fin di aña ta dianan cu ta evoca hopi recuerdo, emocion y e necesidad pa compañerismo. Un sonrisa, un gesto di amistad, atencion, un bishita. Departamento di Salud Publico, Seccion Cuido di Nos Grandinan ta pidi pa miembronan di nos comunidad, for di esunnan mas hoben pa adulto, pa corda riba nos grandinan. Sea ta famia, bisiña, amistad of conoci, duna nos grandinan extra atencion, cuminsa cu miho contacto, mas acercamento den e dianan aki, pero corda riba nan durante di henter e aña tambe.

Ugenia Thomson, kende ta “beleidsmedewerker na Departamento di Salud Publico, Seccion Cuido di Nos Grandinan, ta splica cu tin aproximadamente 20.000 persona den e grupo di edad “60+” bibando na Aruba segun Centraal Bureau Statistiek, pues envehecimento di e poblacion ta un cos cu ta progresando.

Entre e obhetivonan di e Seccion Cuido di Nos Grandinan tin e promocion di contactonan social y mas integracion di hendenan di edad, unda cu ta motiva e comunidad pa bishita nan grandinan, pa extende un man pa yuda nan y pa ta atento pa cualkier desaroyo unda cu e bisiña of miembro di famia di edad avansa mester di un extra atencion, cuido, yudansa y sosten.

“Nos como pueblo di Aruba tin cu stimula y demostra e amor pa nos grandinan,” Ugenia Thomson a laga sa durante di un evento organisa pa Wine & Dine Aruba na e cas di hende grandi di SABA na Oranjestad.

Aruba tin un total di 12 cas di cuido pa hende grandi y ta pidi pa tur esunnan cu tin e capacidad, e tempo y gana pa haci un contribucion, maske con chikito, na alegra e dia pa nos grandinan. Thomson a bisa cu cualkier persona, compania of instancia cu ta interesa pa organisa algo na cualkier un di e casnan of haci un bishita na un grupo di hende grandi, por tuma contacto cu Seccion Cuido di Nos Grandinan na Departamento di Salud Publico pa asina haya e numbernan di telefon y persona di contacto pa regla esaki.

Un bishita por encera henter un evento, pero tambe e por ta algo mas simpel manera un ora pa siman di bon combersacion y un atencion special.

Thomson ta splica cu no mester pensa solamente riba e casnan di hende grandi, pero tambe e bisiña cu ta biba su so of ta su so na cas henter dia. Tin grandinan cu no tin contact social cu otro hendenan y durante di e dianan di fiesta pueblo tin cu duna e servicio pa bishita nan y contribui na haci nan dianan di fiesta agradabel y yena cu amor, e ta agrega.

E evento cu Wine & Dine Aruba a organisa na e complex Pavilioen/San Pedro a resulta un exito rotundo. E doñonan di e restaurantnan y chefnan, e director financiero y e director di e consorcio, tur tabata presente pa prepara y sirbi un cuminda di tres plato na e grandinan y esunnan cu ta cuida nan. E personal completo, incluyendo e personal di cushina y di laundry, como tambe e personal di cuido, di e centro di SABA a uni man y a yuda den henter e proceso.

Lisette Soeiro, kende ta guia di actividadnan pa e cas, a expresa cu nan ta hopi contento cu e actividadnan cu ta wordo organisa pa e grandinan manera e cuminda aki, pero tambe otro actividadnan cu ta tuma luga pa celebra ocasionnan special durante di aña.

E evento di Wine & Dine a inclui tur detaye, te na e biña, punch y cerbes, y un servicio di kita sombre, mescos cu na e restaurantnan cu ta pertenece na e organisacion. Soeiro a bisa cu tabata un dia pa e grandinan gosa di berdad, mescos cu na fiesta di famia, unda cu nan tin e libertad di come, bebe y gosa.

Tabata un placer hopi grandi pa e personal tambe por a sinta cu nan grandinan stima y come hunto, combersa y socialisa, manera e famia grandi cu nan ta henter aña.

Di parti di Wine & Dine Aruba, e director financiero, Fabian Langtinga a expresa cu nan team a consisti di e doñonan y managernan di restaurantnan, como tambe personal di servicio, trahando hunto pa ofrece e grandinan un bunita evento. E idea ta pa no laga e contacto na un evento so, pero pa sigui cu diferente esfuerso durante di henter aña.

E team a keda hopi contento cu nan contribucion na SABA, unda cu nan a ofrece cuminda dushi pa e grandinan disfruta na nan antoho y na grandi.

Seccion Cuido di Nos Grandinan ta encurasha organisacionnan, companianan, pero tambe e ciudadano individual pa corda riba nos grandinan, esunnan vulnerabel den nos comunidad, esunnan cu mester kisas un extra yudansa y no ta pidi p’e, pa extende un man, demostra nan cariño y envolve nan den e comunidad.