WILLEMSTAD – Awe ta pone staf, personal i relashonnan di trabou di Avila Hotel den Pèn na altura ku a bende e akshonnan di e empresa hotelero na un doño nobo, famia Vogels. Dje manera aki ta garantisá tantu kontinuidat di e hotèl ku mas tantu aña den operashon na Kòrsou (kasi 67 aña), komo e puestonan di trabou. Asina aki tambe e kapital invertí ta keda aki komo base sólido pa su futuro desaroyo.
Despues ku e edifisio den Pèn a sirbi diferente funshon, tabata e doño dòkter Pieter Hendrik ‘Gungu’ Maal ku dia 1 di febrüari 1949 a habri su anterior Klínika Thelma komo Avila Hotel ku apénas 18 kama. Poko despues e hotelero nobato a agregá mas kamber i kama i ora nan a konstruí e playa na 1959 el a kambia e nòmber pa Avila Beach Hotel. Dr. Maal a fayesé na 1961 i kuater aña despues a bende e hotèl ku señora Trijntje van der Plas ku na 1977 a pasa esaki pa e hoyero Danes Finn Nicolaj ‘Nic’ Møller.
Bou di su liderato e hotèl gradualmente, pero drástikamente a ekspandé i transformá pa un empresa moderno, ku ta disponé di tur e fasilidatnan pa deleitá e wéspetnan di awendia for di tur parti di mundu. Aktualmente e hotèl tin 150 kamber i suite, diferente restorant i bar (Blues, Belle Terrace, Avila Café, Schooner i Pool bar), tres playa na laman, un pisina amplio, un galeria chikitu di pakus, salanan di konferensia i konsierto, un kancha di tènis i espasio amplio pa stashoná outo. E hotèl ta konosí pa e eventonan musikal, kultural i kulinario ku nan sa organisá ku regularidat, miéntras ku Blues riba djaweps anochi ta para pa jazz. E ekspanshon ku algun ala nobo no a para den kaminda pa mantené e karakter kordial, doméstiko i personal. Tambe despues ku señor Møller a hala bèk na mart 2003 pa traspasá gerensia pa un tim di maneho konsistiendo di su yu muhé Tone i ko-akshonista Paul Kok, el a keda un forsa dinámiko pa sigui mehorá ‘su Avila’ te na mart di e aña aki ora el a fayesé.
Aselerashon
E promé kontaktonan tokante un posibel traspaso di e hotèl pa doñonan nobo ta dato ainda for di tempu ku Nic Møller tabata na bida ainda i ku e tabata al tantu di dje. Den e lunanan tras di lomba e proseso a drenta den un fase di aselerashon. Despues ku Banko Maduro tambe a duna su aprobashon na e plannan detayá di traspaso, no tabatin nada mas ta stroba firmamentu di e konvenio. Na nòmber di e akshonistanan Tone Møller i Paul Kok a pone nan firma. Nan tabata haña esaki un bon momento despues di un karera largu den e ramo aki, en buska di un reto nobo. Gerente General Paul Kok lo keda seis luna mas na Avila pa un transishon mas suave posibel: “Pa nos ta importante ku tantu nos personal komo nos wéspetnan ta ripará mas tiki posibel di e kambio aki. P’esei kontinuidat di servisio ta esensial”, segun señor Kok. Commercial Manager Tone Møller ta keda den kontakto ku Avila, e obra di bida di su tata. Por ehèmpel e lo sigui ku e aktividatnan di Art in Avila ku músika klásiko, algu ku Nic Møller i su esposa Birte Jensen a funda i karga tur e añanan. Tambe e lo duna kontenido na e Fundashon Museo di Octagon pa preservá e patrimonio históriko di e edifisio.
Futuro
Na nòmber di famia e akshonista nobo señor Will Vogels a duna su aprobashon na e akuerdo: “Ta un honor grandi pa por tuma e hotèl aki i sigui desaroy’é. Avila ta un instituto respetá”. E mes tin ya 12 aña komo Managing Director di Lions Dive & Beach Resort kaminda su kasá Katja Vogels ta Director of Operations. Meimei di 2016 Paul Kok lo pasa e batuta pa Robbin, yu hòmber di Will Vogels. Tanten Robbin lo tuma e tareanan di señora Tone Møller komo Commercial Director.
Avila Hotel ta un kompania sano i dinámiko ku a kaba di invertí supstansialmente den mehorashon di e playanan i den renovashon di un grupo di suite. E hotèl ku su personal profeshonal, konosí pa su bon servisio i su amabilidat, ta konfrontá futuro ku ánimo nobo bou di e doñonan nobo. Asina famia Vogels lo manehá dos hotèl, kada un ku su mes karakterístika i klientela.
Famia Vogels tin idea di sigui invertí den Avila Beach Hotel i den futuro oumentá e kantidat di kamber. Esei lo nifiká un kontribushon mas na ekonomia di Kòrsou i lo generá mas empleo. Robbin Vogels gradualmente lo duna su mes toke na e konsepto di Avila, teniendo kuenta ku e espíritu di e époka aki, kaminda lo keda pone énfasis riba e grandesa ku semper Avila a ekspirá. Historia i kultura lo keda okupá un lugá importante den e manera pa posishoná Avila den merkado.