WILLEMSTAD- Desèmber  2015– Ofisina di Turismo di Kòrsou (CTB) resientemente a hasi entrega di sertifikado na dos grupo di kursista ku a finalisá un programa di formashon profeshonal ku éksito. Ta trata aki di kursonan basá riba: Komunikashon Efektivo den idioma Ingles, e balornan di e kampaña di ‘Dushi Hende’, Servisio na kliente, Komunikashon Efektivo i Maneho di Konflikto. Meta di e kursonan aki ta pa garantisá un desaroyo positivo i un nivel haltu di servisio.

E promé grupo ku a risibí nan sertifikado a sigui e kurso di Komunikashon Efektivo den idioma Ingles durante un periodo di 10 siman. E meta prinsipal di e kurso aki ta pa amplia e empleado su konosementu di e idioma ingles, pa hasi komunikashon ku turista mas mihó i si tin barera pa eliminá esaki di manera ku e komunikashon ta mas efektivo. Na tur a hasi entrega di 27 sertifikado kual a keda repartí na 5 empleado di Duana, 7 partisipante di CPA i 15 partisipante di POLITUR.

E di dos grupo ku a risibí nan sertifikado ta e asina yamá ‘frontliners’ ku ta personanan den kontakto direkto ku e turista. Durante un periodo di 6 siman e partisipantenan a risibí kurso di ‘Dushi Hende’, Servisio na kliente, Komunikashon Efektivo i Maneho di Konflikto ku sigur lo kontribuí na nan desaroyo profeshonal. E grupo a konsistí di 28 partisipante kualnan ta: taksistanan di TSA, asistentenan di tienda ku ta laborá na Aldeasa Curaçao N.V. na aeropuerto i empleadonan di e operadornan di tour Atlantis Adventures, Fiesta Tours, Rud Tours i Does Travel. Pabien na tur ku a finalisá e kursonan ku éksito.