E anochi a resultá den un ‘home run’ espektakular!
WILLEMSTAD: Djasabra anochi a tuma lugar e findishi di Curaçao Baseball Week i Digicel ta kontentu di por a forma parti di un evento asina importante pa hóbennan di Kòrsou. “Beisbòl ta un deporte hopi importante pa nos hóbennan, ademas di esei e ta un deporte ku ta trese henter komunidat huntu. E echo ku Curaçao Baseball Week ta kombiná e diferente elementonan aki den nan organisashon ta hasi ku Digicel no por a keda afó”, esaki di akuerdo ku marketing manager di Digicel, Shayenne Rock. “Kòrsou ta pais di orígen di 5 pelotero den liga grandi; hóbennan di Kòrsou tin un potensial enorme pa un futuro den beisbòl, e tipo di motivashon ku Curaçao Baseball Week ta ofresé na e hóben ta yud’é establesé metanan pa futuro. Nos ke forma parti di esaki.”
Ademas di duna klínika na hóbennan i entrenadornan den beisbòl, Curaçao Baseball Week a tene un findishi djasabra anochi ku a resultá masha eksitoso. Digicel ta kontentu di por a yuda rekoudá fondo, esaki via di atkisishon di 2 artíkulo di hopi balor. Awe, Digicel ta doño di un bate firmá dor di Andruw Jones- ku logra konektá 434 ‘home run’ den liga grandi i tabata ingrediente prinsipal pa Atlanta Braves su 14 títulonan kampion. Tambe, Digicel a atkerí un sèt di bala firmá dor di diferente hungadó di liga grandi. E bate a wòrdu entregá na Digicel dor di Kòrsou su promé big leaguer (1989- NY), Hensley ‘Bam Bam’ Meulens, awòki coach di bateo pa SF Giants, na su turno a gradisí Digicel pa e sosten duná na Curaçao Baseball Week i hóbennan prospekto di Kòrsou.
Durante di e anochi Digicel a pone un plan Postpago di 1 aña grátis inkluyendo un smartphone na disposishon di Curaçao Baseball Week ku tambe a resultá na fondo adishonal durante di e fundraising. Tabata un anochi masha eksitoso na unda ku fondonan a keda rekoudá pa sigui motivá hóbennan den e deporte. Digicel ta gradisí e organisashon di Curaçao Baseball Week i mesora a komprometé pa apoyá e selekshon di Kòrsou dia 4 di desèmber próksimo. Ta invitá klientenan di Digicel pa keda pendiente di e página di Facebook di Digicel pa nan tambe gana karchinan pa e wega.