Kòrsou – Rotary Club Willemstad (RCW) ta organisá riba djadumingu 20 di òktober un bia mas su proyekto di fundraising di tur aña, Rotarrally. Rotarrally ta un paseo di pùzel ku tur hende por partisipá n’e, i ta un aktividat dushi pa hinter famia, pero tambe huntu ku amigu òf kolega. Karchi pa Rotarrally ta na benta serka tur miembro di Rotary Club Willemstad. Pa mas informashon interesadonan por yama 522 3078 (Benno van Leeuwen) òf 540 2679 (Bert Aengenendt). Por kumpra karchi na Mensings Caminada tambe.
Paseo di pùzel
E paseo di pùzel ta kuminsá mèrdia 12.30 riba lugá di parker di MCB na Rooi Catootje, banda di Mensings Caminada. E paseo ta pasa den barionan ku normalmente partisipantenan no ta frekuentá asina tantu. Ta un bon chèns pa siña konosé lugánan úniko na Kòrsou mihó. Por kore e paseo di pùzel akí ku outo di persona regular. E partisipantenan ta haña instrukshon, i durante e ruta nan mester kontestá pregunta tokante e besindario. Pa e muchanan ku ta partisipá tin un kompetensha pa mucha di Rotarrally, ku e figura di strep Tooby. Rotarrally 2013 ta kaba na Hòfi Fidel na Santa Catharina. Kontribushon ta 125 florin pa outo partisipante i esaki ta inkluí un tremendo bbq hopi dushi i 2 kos di bebe. Amigu i famia ku no ta partisipá tambe ta bon bini na e bbq. Nan por kumpra karchi pa bbq i ko’i bebe einan mes. Na final di e dia ta anunsiá e ganadónan. Premionan ta entre otro pasashi pa Colombia ku Insel Air, bòn di regalu di Kooyman, El Mexicano i Smooff.
Spònsernan
Rotarrally 2013 tin komo spònsernan di Oro: MCB, EWT, Guardian Group, Coca Cola, Polar Beer, Insel Air i Tooby. Spònsernan di Plata ta: DHL, AFS Curaçao, Fortus en Compliance Services Caribbean. De mas spònsernan ta Renmar Trading, Building Depot, Reclamebureau Ejpeg, Kooyman, El Mexicano i Smooff.
Fundraising pa Fundashon Desaroyo i Progreso (FdiP)
E aña akí e ganashi di Rotarrally ta bai pa e proyekto di deporte di FdiP. E proyekto ta konsistí di un sport-o-theek mobil pa muchanan den edukashon despues di skol. Ku esaki muchanan ku tin tiki posibilidat pa práktika deporte pa motibu ku falta material, ta haña chèns di ta un tiki mas enbolbí ku deporte i wega. E Sport–o-theek ta un bùs ekipá ku material di deporte, di kua e shofùr ta un guiadó di deporte den servisio di FdiP) i ku ta dirigí e aktividatnan deportivo. E sport-o-theek kada mèrdia ta bishita un otro skol, total ta bishitá pa bùrt 22 skol, tur siman 200 mucha, durante 44 siman pa aña. Pafó di ora di trabou e bùs ta parker riba un tereno sigur i ku vigilansha.
Pa loke ta trata e Rotarrally anterior, parti di e ganashi tabata destiná pa Pro Alfa, pa nan proyektonan di alfabetisashon pa duna hóben- i adultonan un di 2 chèns pa siña abilidatnan básiko di trabou i idioma. E ganashi na e okashon ei tabata 30.000 florin. E aña aki tambe Rotarrally ta konta ku e mesun resultado pa FdiP.
Rotary Club Willemstad
Rotary Club Willemstad ta un serviceclub ku ta hasi esfuerso pa sostené diferente proyekto, pero ku tin komo meta prinsipal hóbennan di Kòrsou. Ehèmpelnan di proyektonan ku Rotary Club Willemstad a sostené ku yudansa di e aktividatnan di fundraising akí ta: Stichting voor opvoedingsondersteuning voor kinderen met een handicap, Stichting Sint Vincentius, Fundashon un hóben pa un bon famia, Kas Bruder Pius, Pro Alfa, Stichting SHOCK, Kinderafdeling Sehos i Pro Bista. Tambe tur aña Rotary Club Willemstad ta organisá den luna di yüni un wikènt tokante liderazgo ku ta kulminá ku un Rotary Youth Leadership Award, ku ta duna e ganadó oportunidat pa partisipá den un programa di liderazgo internashonal na Europa òf Merka.