Diamars for di 7’or di anochi, e luznan di e rotonde na Tarabana/Dakota, riba Caya Betico Croes, ta wordo cendi cu un tremendo celebracion cu gaita den presencia di esunnan cu a crea y ehecuta e diseño, esta e hungadonan di SV Dakota, Team Damas y representantenan di Kooyman. E coordinacion di e trabao di e diferente rotondenan rond Aruba ta den man di Team Bo Bario, cu tambe lo ta presente.

A scoge pa e decoracion casnan tipico di Aruba, recrea den miniatura, como tambe un replica festivo di Willem III Toren. Tur hende cu a pasa wak e trabao den proceso ta expresa cu nan ta hopi contento cu e diseño crioyo, clasico y super bunita cu ta evoca sentimentonan di nostalgia di e Aruba di antaño.

Hopi trabao duro y esfuersonan di hopi hende a bay den e diseño pa por logra presenta e “beyesa di rotonde” aki cu tur hende por ta orguyoso di dje.

Comunidad di Aruba henter y particularmente Dakota y Tarabana, y bisiñanan di e barionan den vecindario ta invita pa pasa un rato ameno diamars anochi ora lo cende e luznan y celebra e yegada di ambiente y alegria di Fin di Aña den e vecindario.