WILLEMSTAD – Djasabra dia 21 di novèmber tabata pa promé-promé biaha ku un Sinterklaas ku su asistentenan a bishitá un sentro komersial di Sambil. Esei a sosodé den Sambil Curaçao na Veeris. E bishita tabata mesora un hit. E atardi ei mayornan a bini na gran eskala ku nan yunan na Sambil loke mesora a kibra tur rèkòrt di bishitante riba un dia: alrededor di 15.000 mil persona. Klaro ku tráfiko rondó di Sambil a pega mal pegá pa largu tempu. E enorme lugá pa stashoná outo tabata kompletamente yen i na e parti pafó rondó di Sambil tambe hende a pone nan outo. Paden bo por a kana riba kabes di hende, na moda di papia. Sinterklaas ku su delegashon tabata den Food Court, pero na sierto momento niun hende no por a drenta aya mas; asina tantu hende tabatin. Entre otro pa motibu di e masa di hende aki Sambil Curaçao a registrá te awor un kantidat sin presedente haltu di bishitante den e periodo di djaweps, ora a sende e lusnan festivo di Pasku, te i ku djadumingu: mas ku 27.000.