Algun aña pasá Coca-Cola a lansa su kampaña ‘Share a Coke’ na Australia pa e promé biha. E kampaña aki a bira unu super eksitoso, di manera ku na e momentu aki ya nan a lansé na mas ku 50 país. I for di awor e emboteyadó lokal tambe a kuminsé aki na Kòrsou.

Coca-Cola ta invitá konsumidónan pa buska nan mes nòmber, nòmber di famía, di amigu i kolega. Konsepto di e kampaña ta sigui bòrda riba e tema pa kua e marka ku, ya tin 128 aña, a haña popularidat mundial, esta esun di trese hende huntu i laga nan sinti nan mes spesial.

“E aña aki pa di prome bia den istoria nos a reemplasa nos logo pa nòmbernan mas usá aki na Kòrsou di manera ku klientenan por kompartí nan Coca-Cola ku amigu, famía o hende ku ta spesial pa nan. Ku e konsepto aki nos ke invitá tur hende pa nan re-deskubrí e nifikashon di kompartí”, segun Myrthe Verhulst, Marketing & Sales Manager di Coca-Cola.

Por haña Coca-Cola produsí lokal ku nòmber ariba na bòter di 20 oz; 1 ltr i 2 ltr , produktonan di Coca-Cola, Coca-Cola Light i Coca-Cola Zero. Lo duna publisidat na e kampaña aki pa medio di aviso den i na e diferente medionan sosial di prensa.

Eks Empleado den sentro di atenshon.

E konferensha di prensa a haña un buelta spesial ora ku di pronto Myrthe Verhulst a yama dilanti nos Sales Manager ya penshoná, Sr. He-Leong ‘Lònchi’ Wong i a elogié pa tur su esfuersonan pa e kompanía Coca-Cola durante e 21 añanan ku ela traha. No unikamente ela haña elogio pa su kapasidat di benta i su talento, pero tambe komo ku Lònchi ta un ehèmpel pa loke ta nifiká KOMPARTI i ta ei pa otro.

ROAD SHOW

Personanan ku nan nòmber no ta riba bòter, no tin nodi di desesperá. Coca-Cola a organisá un ‘road show’ durante kua konsumidónan por laga pone nan mes nòmber o nòmber di un persona ku ta spesial pa nan. Mas lat den luna lo anunsiá sitionan i fecha di e ROAD SHOW.