En conexion cu Siman di enfermeria di mucha

ORANJESTAD, Aruba – 19 di november 2015: Magaly Farro ta trahando pa 25 aña caba como kinderverpleegkundige, esta nurse specialisa den cuido di mucha. For di momento cu el a haci su ultimo stage na e kinderafdeling di Hospital durante di e ultimo lunanan di su estudio, el a namora di e departamento y el a haya su vocacion, prome como enfermera y despues como enfermera specialisa den cuido di mucha.

Nurse Farro a haci su opleiding pa verpleegkundige na Aruba y despues di un aña trahando riba kinderafdeling, ela haya e oportunidad pa bay specialisa na Hulanda. E ta bisa cu e trabao no ta facil, y cu ora e duna les na EPI semper e ta bisa e alumnonan cu pa traha riba kinderafdeling nan mester stima mucha y tene semper den mente cu nan ta traha cu mucha cu ta malo.

E parti kisas mas duro di su trabao, segun Farro, ta cu e mester haci muchanan dolor tin biaha pa nan mesun bienestar, pa nan por bira miho. Pero, tur esey e ta lubida y ta dun’e satisfaccion, ora cu e ta wak cu e mucha despues di algun dia of siman miho di salud y cla pa bay cas cu su mayornan.
Dos diferencia grandi entre e tempo cu el a cuminsa traha y awor, ta cu tin mas aparato sofistica disponibel pa nan trabao, y cu mayornan ta mas consciente di enfermedad di nan yiu.

El a splica cu antes e mayor ta haci loke e dokter bisa, pero actualmente nan ta haci mas pregunta, nan ta mas habri y ta mas “mondig”, pues nan kier sa mas. E mayornan ta bay busca riba internet y ta bin cu mas pregunta y como nurse bo mester ta constantemente bezig ta “upgrade” bo mes pa asina por yuda y brinda sosten na e mayornan.

Tin casonan tambe cu e informacion cu e mayornan a haya no ta pas exactamente cu locual nan yiu a wordo diagnostica cun’e y e nurse tambe mester por intercambia cu e mayornan tocante di e informacion aki.

E ta un trabao bunita, e ta subraya, y definitivamente diferente na duna cuido na adulto. E adulto ta bisa loke e ta sinti, pero e mucha ta mas vulnerabel y ta rekeri mas atencion pa por compronde kico e ta sintiendo.
E ta asina bunita ora cu como nurse bo por haci algo pa e mehoracion y bienestar di un ser humano asina vulnerabel, nurse Farro a conclui bisando.