Willemstad – Den kuadro di e dia Internashonal di Aviashon, diferente kompania den e industria aki a uni pa organisá un dia habri pa públiko di Kòrsou  por sera konosí ku tur loke tin di haber ku aviashon.  E motibu pa e dia habri aki ta pa públiko bira konsiente i alabes apresiá kiko e industria aki ta aportá na ekonomia di Kòrsou. 

E dia internashonal di aviashon mes ta riba 7 di desèmber, motibu ku esaki ta riba un djaluna, e dia habri ta keda organisá riba e dia anterior kual ta djadumingu 6 di desèmber. Inisiativa pa selebrá e dia aki ta Ministerio di Tráfiko, Transporte i Planifikashon Urbano kual ta konsiderá e dia aki di suma importansia. Konhuntamente ku otro kompanianan manera InselAir, Falki Aviation Curacao, CATS, International Skills Academy Dutch Caribbean, United Caribbean Airlines Ltd, CAP, Arke Fly TUI i Dutch Caribbean Air Navigation Service Provider ta organisá un dia yen di informashon, aktividat I ambiente.  Riba e dia aki tin demonstrashon di skydiving, water bucket i brantwer. Tambe lo tin un Aviation Village ku diferente stent ku informashon i kuminda. Un di e parti interesante di e dia aki lo  ta un tur den hangar pero tambe lo tin diferente avion riba rampa.

Un dia ideal pa disfrutá ku famia y alabes informativo pa grandi i chikí. E dia habri lo ta djadumingu 6 di desèmber di 10or di mainta pa 6or di atardi na Hato Office park kual ta situá dilanti di Grotten van Hato. Entrada ta grátis.