Minister Otmar Oduber a reconoce chauffeur di Arubus

Dialuna mainta Minister Otmar Oduber a invita prensa pa den un forma special haci reconocimento na Sr. Edwin Julio Bernabela, chauffeur di Arubus, cu e titulo di Embahador di Bon Boluntad como muestra di aprecio pa su balentia, reaccion rapido y bon trabou pa sa di maniobra corectamente y asina evita un situacion di calamidad.

No ta mucho tempo pasa cu a tuma luga un accidente unda un auto a dal den un bus di Arubus cu lo por tabatin consecuencianan hopi mas grave cu loke a pasa y esaki danki na e reaccion rapido di Sr. Bernabela. Minister Oduber ta splica: “Segun tur e rapportnan cu nos por a ricibi ta indica cu danki na Sr. Bernabela cu tur su experiencia trahando den e ramo aki na Arubus a evita lo peor e dia ey. Mi ta haya na su luga pa publicamente gradici Sr. Bernabela di curazon den nomber di Gobierno di Aruba pero tambe den nomber di comunidad di Aruba, pa a haci locual un bon ser humano lo haci den un circunstancia asina.”

Sr. Bernabela ta splica cu tur cos a pasa hopi lihe y ta gradici Tata Todopoderoso pa a giue y a scapa tur hende di un desgracia.

E tabata un momento hopi special pa tur hende presente pa por a gradici Sr. Bernabela asina aki pa su balentia y reaccion rapido cu a evita un desgracia mayor.