Minister Oduber a reuni cu SMAC Y MUSICA

Dialuna mainta tempran a tuma luga un reunion cu tabata planea for di algun siman caba entre Minister Otmar Oduber conhuntamente cu  SMAC y MUSICA pa dialoga riba e temporada di Carnaval cu a pasa. Por menciona cu e no tabata un reunion facil mirando cu tabatin puntonan fuerte cu mester a wordo atendi cu ne. Tabatin 3 punto riba agenda di cual 2 ya caba a yega na un acuerdo riba nan den un forma amical.

E prome punto ta e rapport financiero di MUSICA unda SMAC a bay di acuerdo cu ne y a palabra cu dialuna mes lo transferi e suma pa cera e buki pa locual ta trata 2015.

Na di dos luga a toca e tema di e participacion di MUSICA den SMAC. Manera ta conoci SMAC ta consisti di diferente miembro unda MUSICA tambe ta conta cu representacion. A keda palabra cu pa diabierna awo lo publica e miembronan pa asina tin un organisacion completo pa organisa e actividadnan di Carnaval 62.

E di tres punto ta e organisacion di e Caiso and Soca Monarch Festival 2016. Minister Oduber ta comenta: “Nos  a yega basta leu, tin un proposicion riba mesa di parti SMAC cu a presenta esaki na MUSICA. MUSICA awor ta preparando su contra proposicion pa presenta esaki, pero mi ta sinti cu e esfuersonan cu a wordo haci lo por yega na un solucion pronto pa continua cu un trankilidad cu por spera di un Carnaval relativamente cortico di 5 siman. Nos no mester perde ni un minuut di e goso y alegria cu por tin di e temporada.”

E mandatario ta contento cu e reunion a bay bon mirando cu dos punto a keda acorda y di 3 ta hopi cerca di yega na otro. Intencion ta pa otro siman esaki ta completamente soluciona.

Sr. Oduber ta sigui bisa: “Locual a sobresali y ta di lamenta, pa mira e mal intencion di hendenan cu kier mira cos bay malo. Purba influencia  a traves di comentarionan creando di e forma aki scenarionan cu no ta existi y den e caso aki durante e reunion a papia hopi di esaki. Hopi biaha esnan pafo cu no necesariamente ta forma parti di e organisacionnan ta esnan cu ta purba bruha tera, pone iritacionnan entre e diferente organisacionnan.” Tanto SMAC y MUSICA durante e reunion a acorda cu lo evita di permiti e casonan aki bolbe ripiti.  E mandatario ta elabora: “A acorda pa tin mas comunicacion mas dialogo manera ma suplica dia 11 di 11, y ta sinti cu esey ta bay ta e caso mirando cu tin boluntad pa esaki.”

E mandatario ta termina bisando: “Laga e organisacion cu ta SMAC cu tin miembronan di grupo di Carnaval y miembronan di MUSICA hunto organisa Carnaval 62 unda nos tur por ta orguyoso di dje.”