Armando Goedgedrag, Cado De Lannoy y Luis Mesquita lo exhibi nan arte

ORANJESTAD– november – Diahuebs venidero entre 7’or y 9’or di anochi Starbucks Paseo Herencia lo habri un exposicion di arte cu sigur lo ta interesante pa publico general, pero principalmente pa e amante di arte. Tres artista local lo expone nan arte, durante 1 siman largo. Ta trata aki di Armando Goedgedrag, Cado Delannoy y Luis Mesquita.

• Armando Goedgedrag, naci na Hulanda ta un pintor hoben y specialista den multimedia- actualmente e ta biba na Aruba. Despues di ricibi su Bachelor’s degree den Communication & Multimedia Design na Noordelijke Hogeschool Leeuwarden y su Master den Animation na AKV St. Joost Avans Hogeschool Breda na Hulanda e la opta bin biba na Aruba. Ademas di ta enfoca riba su estudionan su pasion pa pintura semper tabata presente, esaki mes a motiv’e pa sigui algun curso cerca Gustave Nouel y Elvis Lopez. Armando ta purba pa expresa e beyesa di naturalesa via di su pinturanan. Na Hulanda e’la participa na exposicion ‘Rondom Oranje’ dedica na famia Real- e tabata e participante di mas hoben. Durante di Aruba Dag na Den Haag e’la ricibi oportunidad di un exposicion propio; actualmente e tin un pintura di un shoco cu ta expone den e sala prominente ‘Sala di Betico’ na Arubahuis. Riba rednan social e ta conoci pa su videonan ‘speed painting’ riba Facebook, Youtube y Vimeo. Mayoria di su pinturanan ta realista, pero tin biaha cu elementonan abstracto y surrealista.
• Cado De Lannoy, fotografo cu ta gusta saca potret di Aruba su tesoronan scondi. E ta explora monumentonan bandona y sitionan scondi- cu su lens e ta capta e colornan vivído y historia di e edificionan cu awor ta lubida. Esaki ta duna su publico un perspectiva diferente di e beyesa cu Aruba tin. Cado, ta fundado di Korteweg.
• Luis Mesquita, su trabou ta cubri gama di color y diferente forma. For di ‘tenue’, colornan cu ta refleha cosnan di naturalesa, manera e magia cu tin den criaturanan maritimo. Tambe colornan inspira dor di positivismo i arte vishonario. Luis ta crea arte di ‘driftwood’ colecta for di diferente beach di Aruba. Pa mas informacion charruart.com

Ta invita tur cliente pa bishita Starbucks Paseo Herencia diahuebs awor entre 7’or y 9’or. Tur tres artista lo ta den Starbucks pa conta di nan pasion pa arte y nan inspiracion. Lo tin coffee tasting pa tur presente y pa añadi musica na e exposicion lo tin presentacion di Jazz Xpressions.