Djasabra último den Because Entertainment Center Grupo Karnaval Helengue a demostrá e trahenan general ku a ser adaptá i mester bisa ku awor si Helengue ta kla pa e debut den gran marcha 2016. E trahenan a ser adaptá  ku un headpiece nobo i tur e trahenan a bira super kolorido, ku hopi pluma i piedra briante i bunita pa asina e trahe hasi un estrago den gran marcha di karnaval 2016.

E motibu prinsipal ku Danny i su direktiva di Helengue  a hasi un adaptashon na e sekshon general di e grupo ta debí ku e sekshon Luxurious i Fun su trahenan ta mas kolorido. E akohida serka e Helengueronan mes i e  públiko tabata inmenso i sin duda tur e trahenan tantu di e damanan i e kabayeronan a kai na smak di tur persona ku tabata presente. Tin hopi reakshon pa bira miembro di Helengue i ta p’esei ta duna oportunidat na esnan ku ke forma parti den e grupo. Helengue ta bai den karnaval ku e DJ di aña ku ta DJ RO-1, e Entertainment band di aña ku ta Dolce, e artista di aña Hunelly Felicia den algun spòt, Cache Royale i NSTY-Play i pa pone e chèri riba e bolo den grupo Helengue tin e artista internashonal ku ta Alison Hinds direktamente for di Barbados ku tambe ta bai  marcha ku Helengue. Helengue ta para pa positivismo, alegria, inovashon, moderno i e énfasis ta ambiente. I awor mas ku nunka ku e trahenan adaptá pa asina duna realse na Kòrsou su karnaval. Helengue ta bai marka historia i otro aña Helengue ta debutá den karnaval ku vários trailer i  2 karosa kual unu ta komersial. Keda pendiente pa esaki. Si bo ke ta den Helengue bo por yama òf app Danny Yanga na number di telefòn 5213700. Spera mas di Helengue ku ta e espektákulo grandi pa Kòrsou su karnaval 2016.