Helengue a bai ku ne!
11 di novèmber 2015, Coridja Stars Production a organisá e promé aktivdat pa dje forma akí kuminsá drenta den ambiente di Karnaval 2016.
Un publiko grandi a haña kaminda pa Roosevelt Party Center pa disfrutá di loke e partisipantenan a prepará den ambiente di basilon. Tabatin algun partisipante ku den pitu a haña miedu i no a presentá mas, pero esnan ku tabatin e kurashi di sigui a sa di trese un tremendo espektakulo i a sa di pone tur hende presente hari nan barika yen.
E MC Finchi Statie tambe a sa di pone un i tur hari manera ta su kustumber. E agurpashon musikal di hóben “Chibilin” ku a ayera a debutá a hasi un tremendo trabou kompañando tur e partisipante nan.
E partisipantenan tabata di UDC/CDC Jordan Quan, di Ancilla Dominie Rodjeska Martina, di Karnaval riba kabai David Hugo, di Kuerp Polisial Leonard Rosales, di On Point Fardy Lard, di Coridja Stars Rodien Genaro, di Estreno di Pikete Verna Kastaneer i Meredith Mauricia i di Henlengue ku Surlema Minguel.
Tantu Kusters Trading komo Nagico a sòru pa hasi e anochi ei posibel. Nagico a regalá tur e partisipantenan ku a representá un grupo di Karnaval Fl. 500,– pa nan grupo. Un gesto ku a kai masha na smak serka e gruponan ku a partisipá.
Durante e anochi ei a duna rekonosementu na 3 baluarte ku a nifiká masha hopi pa karnaval di Kòrsou. Nan tabata pa hopi aña na kabes di gruponan ku a destaká den pasado.
Nos ta referí akí na Sra Hilda “Dachi” Vinck di e grupo Jumping Hats, Alvin Rodriquez di PPUP, Pa pasa un prèt i Sr Robert “Robby”Nahr di promé grupo Bunitesa di Hardin i despues grupo Nos ke nos por. Tur a risibí un plakat di merito for di man di Presidente di CSP Sra. Corine Djaoen Genaro. Tambe tur e baluartenan a risibí nan karnèt pa por asistí na tur evento di Karnaval organisá pa Coridja Stars kompletamente grátis.
Despues di e promé ròndu, hurado a skohé 5 partisipante pa bolbe presentá nan tumba. Esakinan a resultá Kuerp Polisial Leonard Rosales, On Point Fardy Lard , Coridja Stars Rodien Genaro, Estreno di Pikete Verna Kastaneer i Meredith Mauricia i Henlengue ku Surlema Minguel.
Na final un kuerpo di Hurado a skohé Rodien Genaro representando Coridja Stars na di dos lugá, Verna Kastaneer i Meredith Mauricia di Estreno di Pikete komo number un i e ganadó apsoluto a resultá Surlema Minguel di grupo Henlengue.
Mirando e akohida ku tabatin e anochi ei sigur Coridja Stars lo konsiderá pa pone e aktivdat akí otro aña tambe riba e kalendario Karnavalesko.