Uphill Challenge promé paso pa 24 di yanüari 2016

WILLEMSTAD – Meskos ku den pasado, último lunanan a traha tur ku tin na e edishon mas resien di The Uphill Challenge, ku djasabra último 7 di novèmber a tuma lugá riba i rondó di Tafelberg na Santa Barbara Plantation. Ta trata di un reto deportivo pa kua por trein –hasta ta rekomendabel pa hasi esei – pa hasié un tremendo espektákulo pa rekoudá fondo pa e lucha kontra kanser. Djasabra ei nan a logra rekoudá na total mas ku 78 mil florin pa Prinses Wilhelmina Fonds

E biaha aki e kantidat di partisipante tabata ménos ku na yanüari e aña aki ora a tene e evento aki pa promé biaha na Tafelberg (anteriormente Fort Nassau tabata e sitio). Posiblemente e kambio di fecha a hunga un ròl. E organisadónan tabatin bon motibu pa no forsa e evento aki den e periodo kargá di karnaval, pero pa e siguiente biaha lo evaluá e punto aki dinobo. Echo ta ku den e fin di siman tras di lomba tabatin un kantidat grandi di evento ku ta hala públiko.

Esnan ku a presentá na salida, entre 2 or i mitar di 5 pa e Rònchi Tafelberg di 13 kilometer i entre 5 or i 9 or pa e Uphill Challenge di 1,3 kilometer pa subi e seru, a demostrá karakter i a mustra ku lucha bo mes i perseverá pa yega na prestashon ta e estímulo korekto pa superá opstákulo i alkansá meta, den esei ku yudansa i apoyá pa otronan ku ta lucha pareu ku bo i ku ta rondoná bo. Esei a kontribuí entre otro na bon resultado. Individualmente entre e hendenan hòmber e biaha aki Emiel Bos a subi seru mas tantu be i pa kada be el a logra hala mas plaka aden. Na di dos lugá tin Roland Gielingh ku Daniel Rivero na di tres lugá. Entre e damanan individual Mirte Eekhof a liderá e grupo, siguí pa Jessica Ijff na di dos lugá i Bibi Brugman na di tres puesto.
E mihó rekoudadó di fondo entre e hóbennan ta George Brugman jr. i entre e adultonan ta Kees Barneveld ku Mirte Eekhof na puesto dos. Pa su prestashon komo mihó fundraiser Kees Barneveld a haña di Fundashon Ride for The Roses un pasashi pa Miami, patrosiná pa Insel Air. Mirte Eekhof a haña un pasashi par Medellin, tambe patrosiná pa Insel Air. E tim ku a logra kolektá mas tantu fondo tabata konsistí di 7 hende muhé ku komo Tim Zadelpijn a manifestá fuertemente. Koriendo baiskel nan a generá un suma di 4700 florin. Entre esnan junior Gijs Hendricks tabata e ‘suministradó mayó’.

“E Uphill Challenge tabata den e área bunita di Santa Barbara ku Tafelberg komo punto sentral kaminda a kore baiskel, komo símbolo di e lucha kontra kanser i no na último lugá kaminda a traha pa rekoudá fondo. Pa esei nos ta gradisí di kurason tur partisipante, kolaborador, voluntario, Krus Kòrá, Orco Bank komo e promé spònser prinsipal, Kooyman komo e di dos spònser prinsipal, e otro spònser i donatùrnan, i tur e otronan ku a duna nan granito i di mes tambe tur ku a bini pa apoyá e partisipantenan. Esaki tabata un promé paso pa e evento grandi di dia 24 di yanüari awor, esta e Walk, Ride, Swim & Sail for the Roses”, segun Robbin Martina, presidente di fundashon Stichting Ride for the Roses Curaçao (RFTRC), e organisashon ku ta karga tur evento di Ride for the Roses. El a agregá ku e evento aki ta kuadra ku un nesesidat ku a sinti pa organisá evento ku un grado haltu di alegria kaminda tur hende ta komprometé na rekoudá fondo kombiná ku alkansá prestashon deportivo impreshonante.