Pa medio di proyektonan práktiko i ku kolaborashon di instansianan lokal i di Hulanda

WILLEMSTAD – Djabièrnè atardi a tuma lugá na Hotel Acoya un rueda di prensa durante kua representantenan di e Fundashon Portanan pa Trabou (FPT) a informá di plan i proyektonan ku e Fundashon ta bai realisá a korto plaso huntu ku diferente stakeholders lokal, den estrecho koperashon ku organisashonnan na Hulanda ku ta traha riba meta i ophetivonan komun. E siman di trabou ku ta tras di lomba Fundashon Portanan Pa Trabou (FPT) tabata anfitrion pa un delegashon di Hulanda ku kua a hiba diferente reunion i tambe a bishitá diferente instansia na Kòrsou ku lo ta stakeholdernan den diferente proyekto riba kua e organisashonnan ta traha huntu. Meta di Fundashon Portanan Pa Trabou ta traha na kapasitashon i motivashon di hendenan ku, pa diferente motibu, distansia di merkado laboral.

Bou di kordinashon di Sra. drs. Marelva Jansen-Liberia, inisiadó di Fundashon Portanan pa Trabou (FPT), kende a ser asistí pa Sr. Cesar Paas, tambe inisiadó di FPT i Sra. Mirieta Lourens-de Lanoy, últimonan aki spesialistanan riba tereno di Maneho di Rekurso Humano, a risibí i prepará un siman di trabou i bishita intensivo komo follow up na un kombenio di koperashon , firmá na luna di  aprel 2015 na ‘s Hertogenbosch.

Durante di e interkambio di konosementu i abilidatnan relashoná ku partisipashon igual i hustu na merkado laboral na Kòrsou, e delegashon di Hulanda konsistiendo di sr. Huib van Olden, ‘wethouder’ di e munisipio di ‘s Hertogenbosch,  sr. Sjoerd van het Erve, direktor, sra. Leida Rasing, direktor athuntu di e organisashon Weener XL i Sr. Ruud Luchteveld, presidente, sr. Peter Meijer, Vice Presidente i sr. Frank Willekens, miembro di direktiva di Stichting Koninkrijks Samenwerking (S.K.S) a partisipá na un programa hopi variá i intensivo pa sera konosí mas di aserka ku nos isla, su hendenan i organisashonnan relevante.

E programa di e bishita di trabou  di FPT i representantenan di Hulanda menshoná mas ariba, a bishitá nos Gobernador, Su Excelensia Sra. Lucille George-Wout i algun Ministerio di Gobièrnu, manera Ministerio di Hustisia, ku kua ta hibando kòmbersashonnan relashoná ku un proyekto pa krea trabou pa eks detenidonan. Tambe a bishitá Ministerionan di Desaroyo di Ekonomia i Ministerio di Desaroyo Sosial i Labor i Bienestar. Di parti Ulanda nos a bishitá Nederlandse Vertegenwoordinging voor Aruba, Curacao en St. Maarten na Scharloweg. Alabes a bishitá 2 leerwerk- bedrijf pa hóben i e proyektonan, Fort Beekenburg i Parke Tropikal. Esakinan ta kai bou di enkargo di FIDE/Reinfoke, ku ta resortá bou di Ministerio di Enseñansa. Komo ku koperashon ku empresarionan ta haltu riba agènda di Fundashon Portanan pa Trabou e delegashon lokal i di Hulanda a bishitá Kamara di Komersio. Serka Kamara di Komersio  a elaborá tokante di potenshal di mundu empresarial di Kòrsou i posibilidatnan di partisipashon na merkado laboral di e grupo di enfoke di e FPT.

A bishitá alabes Fundashon Bo Mes Forsa (BOF) den kuadro di e proyekto Lora Man o sea “part-time ondernemersschap” i  Fundashon Alton Paas, ku ta spesialisá riba limitashon físiko, spesial dwarslaesie. Pa e parti di training pa trabou a bishitá Feffik, ku kual tambe lo firma un akuerdo di koperashon den futuro, den kuadro di kursonan dirigí riba desaroyo personal, profeshonal i partisipashon na merkado di trabou (arbeidsethos).

Meta di e bishita

Meta ta pa logra algun aktividat konkreto kaminda ta  traha riba un maneho práktiko, struktural i sistemátiko pa pone e grupo di enfoke, ku ta  personanan ku un limitashon soshal (p.e. eks detenidonan, eks drogadiktonan etc.), personanan sin diploma òf sin un kualifikashon básiko i personanan ku limitashon físiko i mental. Pa krea ambiente di trabou spesífiko pa habri ‘portanan pa trabou’ pa e personanan aki. E grupo spesífiko aki FPT  ta prepará nan mentalmente i kapasitá nan pa drenta merkado Laboral. E personanan di e grupo di enfoke spesífiko aki ta ser guiá pa FPT personalmente i riba trabou pa keda motivá i produktivo pa mantené nan kupo di trabou.

Pa por realisá metanan di FPT i pa ta éskitoso a stipulá e siguiente puntonan di salida:

1. Mester traha dirigí riba kambio Mindset, esaki ta enserá ku ta huntu ku sosiedat (‘bottum up’) mester lanta konsenshi pa krea apoyo mas ampio posibel (‘draagvlak’)
2. Kolaborashon entre e 3 O’s (Onderwijs, Ondernemers, en Overheid). E pilánan aki Enseñansa, mundu Empresarial i Gobernashon ( E.E.G.) mester traha huntu kaminda Gobièrnu ta fasilitá i yuda.
3. Komunidat kompletu mester yuda den e problemátiko di partisipashon di tur siudadano den merkado laboral.
4. Tur siudadano mester tin un lugá den sosiedat. Pues mester tin oportunidat hustu i igual pa tur hende tin trabou, kas i posibilidat pa desaroyá talento
5. Partisipashon na merkado laboral mester ta depolitisá i saká for di ámbito debatenan polítiko. Tur nanishi mester ta den un direkshon pa traha di un forma efikas na edifiká nos komunidat.
6. Tin trabou ta un derechi sagrado di tur siudadano.

Meta di Fundashon Portanan pa Trabou ta pa traha huntu ku tur organisashon riba e terenonan menshoná aki ‘riba. Solamente trahando HUNTU nos ta fuerte; “Samen zijn wij Sterk”.