Djabièrnè durante oranan di mainta, New Song College a tene un tremendo apertura di su biblioteka, NSC MINI BIB.

Pa varios tempu kaba, tantu alumnonan komo dosentenan di New Song College tabatin e deseo di habri un espasio kaminda e hobennan por tin e fasilidat di fia un buki i lesa. Después di varios aña, ayera por fin e soño aki a bira realidat, despues ku, den presensia di tur alumno, mayornan i demas invitadonan, a tene un tremendo apertura di NSC su biblioteka nobo.

E apertura tabatin un programa kargá kaminda diferente persona a hiba palabra entre otro, Pastor Welton Esprit, sra. Diana Lebacs i tambe sr. Pacheco Domacasse. Por a konta tambe ku presensia di representante di Minister di Enseñansa, Siensia, Kultura i Deporte sr. Tico Vos, sra. Marilyn Overman, sra. Milaika Mathilda i tambe presidente di e bestür di SCONS sr. Andre Nahr.

Komo parti di e programa e alumno Zikeo de Lanoy a deklamá un poesia propio ku a trata e tópiko di lesamentu. Después ku Pastor Esprit a dediká e biblioteka na Dios den orashon, sra. Lebacs i e alumno Nigel Lucia, a korta sinta pa ofisialmente inougurá e biblioteka nobo.

NSC MINI BIB ya kaba ta konta ku mas ku 300 buki den e idiomanan papiamentu, ingles, ulandes i spañó i e tin e fasilidat di por skucha oudio. Pronto e biblioteka tambe lo tin e kapasidat pa por wak video. Esaki sigur lo ta di gran benefisio pa e alumnonan ya ku nan lo por desaroyá nan abilidat di lesa i nan konosementu di idioma.