E siman di beisbol di Korsou “Curaçao Baseball Week” ku orguyo ta presenta tres partner nobo:: KNBSB, Bay West i ENNIA. Konhuntamente ku e partnernan aktual, Curaçao Tourist Board, Maduro & Curiel’s Bank, Insel Air, Corendon i organisado  Blue Bay Curaçao, nan ta perkura pa un fundeshi fuerte pa laga CBW krese i bira e evento di mas grandi di beisbol di nos region.

KNBSB

Na prinsipio di 2013 e inisiativa pa Curaçao Baseball Week a surgi den kolaborashon di KNBSB, ku ta e federashon di beisbol i softbol di Hulanda.  Ta danki na e hecho ku e forsanan aki a bai huntu, e evento a eksperensia e kresemento positivo ku a keda registrá. Esaki ta pone tambe ku durante di e proksimo edishon tantu e seminarionan ku koachnan komo e klínika pa e muchanan lo bai ta di un nivel mas haltu. Lo bai tin oradornan internashonal i trainernan di nivel di MLB pa partisipa na e seminario i e klínikanan riba tereno. Nan lo tey tambe pa duna e koach i managernan lokal seshonan di praktika. I e klínikanan e biaha alki lo bai ensera e programa di “Pitch, Hit & Run” ku lo ta na enkargo di MLN i KNBSB.

Bay West

E empresa Bay West ta esteblesé aki for di 2003 i ta spesialisa den e sektor di komestibles i di limpiesa. Bay West ta duna hopi importansia na e konsientisashon sosial di Korsou. Komo un partner di CBW , Baywest ke duna su aporte pa duna un empuhe na deporte di nos hunbentut i konsekuentemente, duna pais Korsou algu bek.

ENNIA

Ya ta algun aña kaba ku ENNIA ta e sponsor fiel di ‘Santa Rosa Indians’ i pa e proksimo dos añanan lo ta partner di CBW. No ta un sekreto ku ENNIA a traha nomber i fama den e komunidat di beisbol. ENNIA tambe di e forma aki ke duna un kontribushon pa e desaroyo positivo di e deporte di beisbol. Rogier van der Meer, Direktor Komersial Blue Bay Resort ta mashá enstusiasma ku e tres partnernan nobo di CBW. : ‘’Ku  KNBSB, Bay West i Ennia komo partner di e proyekto CBW, nos ta haña e posibilidat di hasi e siman di beisbol di Korsou ainda mas grandi”, e ta bisa. “ Huntu ku nos partnernan nos ta bai duna Korsou un sorpresa super agradabel di beisbol e proksimo añanan. Tur esaki lo ta den kuadro di nos muchanan, desaroyo di talento i deporte den e sentido mas amplio di palabra”, e ta sigura.  Curaçao Baseball Week 2015 ta tuma lugá entrante 27 di November te ku 4 di Desember 2015. E biaha aki e anochi final lo tin un ‘Ball Park Night’  espektakular den  Tio Daou Ball Park, Djabierne 4 di Desember.