A konfirmá nòmbernan konosí den mundu di moda internashonal ku lo ta na Aruba

Di novèmber 7-10,2013– BCBG, Gottex, Oakley’- PROJECT RUNWAY designer Layana Aguilar i diseñadornan lokal presente na Aruba

ORANJESTAD/ WILLEMSTAD:- Pa di tres aña konsekutivo Aruba lo ta e anfitrion di Aruba In Style, un evento di moda ku lo tuma lugar durante 4 dia ku enfoke e aña aki ariba ‘Resort wear i ready-to- wear’. Di djaweps 7 te ku djadumingu 10 di novèmber tur fashionista i esnan ku ta sigui moda por disfrutá di un fin di siman yená ku “glitz and glamour” na Aruba organisá pa Aruba Fashion Group i komo patrosinador prinsipal Aruba Tourism Authority. Djarason último na St. Tropez e enkuentro ku prensa a tuma lugar p’asina introdusí e proyekto na Kòrsou. Lo tin presentashon di diseñadornan internashonal i renombrá manera BGBC, Gottex, Oakley, i Aqua Bendita. Ademas di esaki diseñadora di Project Runway Layana Aguilar prosedente di Brazil lo ta presente. A logra sigurá esaki huntu ku Divi Resorts ku a inisiá un kompetensia na New York kaminda ku e felis ganador(a) risibí entre otro un estadia di 7 anochi pa dos persona ku tur kos inkluí na Divi Aruba, 2 pasashi ida i buèlta pa Aruba i muchu mas ofresí pa Divi Aruba. Loke ku ta hasi e sorteo aki mas atraktivo ta ku e ganador(a) ta biaha pa Aruba pa Aruba In Style ku Project Runway designer Layana Aguilar i atendé e fashionweek aki lusiendo vestuario di Layana. Ademas e ganador(a) ta risibí un diseño di Layana pa bai kas kuné i un total di $2,500 pa shòp na Aruba, konhuntamente ku  Layana, na kualkier tienda ku e ganador(a) ta deseá. For di Kòrsou lo ta presente Rebecca Paz di ‘Beck Dutch Designs’ ku su diseñonan di joya. Pa Aruba lo presentá diseñadora Gigliola Gomez, rekonosé komo gran fashionista di e isla. Den transkurso di e próksimo dianan mas diseñadornan lo wòrdu konfirmá. Den añanan anterior Aruba In Style tabata tin e honor di mira presentashon di entre otro Custo Barcelona, ISSA London, Charlotte Ronson, David Yurman, Parke & Ronen i tabata tin di bishita super modelo Chrissy Teigen di Sports Illustrated. E aña aki un biaha mas lo tin mas di 40 prensa internashonal presente for di Brazil, Ulanda, Merka, Venezuela, Chile, Colombia i Kòrsou. Entre nan medionan manera Harpers Bazaar, NBC Latino, Vogue Latino America, Cosmo Español, Life & Style, US Weekly, Telemundo, People, E! Television i hopi mas. Un programa hopi interesante a wòrdu hinká den otro konhuntamente ku Aruba Tourism Authority pa asina duna kada prensa e oportunidat di eksperenshá loke Aruba tin di ofresé. Westin Hotel lo ta e hotèl anfitrion pa AIS 2013 na unda ku lo tin un eksposishon di fotografia di Damilice Mansur. Ademas di Westin AIS tin kooperashon di Renaissance, Hyatt, Divi Phoenix, i Brickell Bay. Tur dia lo tin live DJ’s, fashion cocktails, fashion menu’s na diferente restorant i tur anochi lo tin “after parties” na Confessions Night Club. Weekend package ta wòrdu bendí na rason di $60 pa tur 4 dia. Lo tin diferente paketenan di hotèl. Pa mas informashon sigui www.facebook.com/arubainstyle òf bishitá www.arubainstyle.com