Dianan 27, 28 y 29 di november proximo
ORANJESTAD, Aruba – 04 di November 2015: E dianan ta yegando mas y mas cerca pa e reapertura oficial di Joe Laveist Sport Park.
Comision re-apertura Joe Laveist Sport Park hunto cu Aruba Sport Unie (ASU) ta sigui traha masha duro mes riba e reapertura di Joe Laveist Sport Park dianan 27, 28 y 29 di november proximo cu diferente actividad y evento. Dia 27 di november e apertura oficial di e facilidadnan ta tuma luga cu lo inicia pa 6 or di atardi. E culminacion ta e bunita y grandioso show di apertura y lo concentra riba honra esunnan cu a sostene e sport park y grandinan den e mundo di deporte, specialmente di Baseball. Pa 9 or di mainta lo inicia cu e encuentro Internacional di volleyball, cual ta un oportunidad pa tur mucha presencia y asina cuminsa sondea posibilidadnan pa join un team di deporte. Principalmente e scolnan. Un di e highlightnan sigur lo ta e encuentro Interinsular di Beisbol na unda Corsou y Aruba lo midi forsa. Wild Cats di Corsou lo enfrenta All Star Team di Aruba, mientras cu pa Beach Volleyball lo tin 3 team masculino cu lo midi forsa cu e atletanan di Aruba. Boxeo tambe ta riba e lista di eventonan. Ta un dicha pa mira asina hopi encuentronan deportivo bek den “Joe Laveist Sport Park”. E diasabra aki, 7 di November 2015, e Comision re – apertura Joe Laveist Sport Park lo ta na e Feria di Educacion y Salud y tambe na Aruba One Love Reggae Festival 2015 p’asina conscientisa Aruba riba e importancia di e reapertura di Joe Laveist Sport Park y e acontecimentonan cu esaki ta trece cune. Joe Laveist Sport Park tin luznan nobo, tribuna y daknan di tribuna nobo, un score board moderno cu ta traha cu “remote control”, facilidadnan pa reporteronan transmiti wega, un veld completamente renoba y un “zandbak” pa haci e deportenan di beach, manera beach volleyball y beach tennis. E di tres fase di e renobacion y expansion di Joe Laveist Sport Park ta encera construccion di dos sala grandi pa “indoor sports”, manera taekwondo, basketball, karate, boxeo, etc. Despues di su apertura oficial Joe Laveist Sport Park ta bek na disposicion di San Nicolas y e comunidad di Aruba en general. Pone e fecha den bo agenda, e invitacion sigur ta pa un y tur en special e hubentud pa bin disfruta di deporte cu lo inicia cu e re- apertura dia 27 di November, 28 di November e MLB all Stars Game y diferente weganan dia 29 di November. “Take me back to the Ball Game!” Aruba Get ready “ The Pot is heating up on the stove”. Bishita nos Facebook pagina y keda al tanto di tur loke ta bay pasa riba e dianan importante aki pa San Nicolas, Deporte y Aruba en general.