– CIBC FirstCaribbean resientemente a lansa su servisio i produktonan di Business Banking na e komunidat empresarial di Kòrsou durante di un seminario finansiero, “Pathway to profitability and what the new tax legislation means for you”.  E produkto i servisionan di Business Banking di e banko ta un konstesta na e nesesidat moderno di e empresanan chikí i mediano.

E solushon i servisionan ofresé ta trahá na midi di e doño di e empresa i ta sostené e kresementu duradero di e empresa chikí i mediano.  Durante di e lansamentu, CIBC FirstCaribbean a presentá e diferente solushonnan ku Business Banking tin pa ofresé i ekspertonan di BDO Dutch Caribbean a elaborá riba kon krea un trayekto dirigí pa logra eksito i e diferente kambionan den e régimen fiskal ku resientemente a keda introdusí.

Gerente General di CIBC FirstCaribbean pa Karibe Ulandes, Pim van der Burg, durante su introdukshon brevio na inisio di e evento a suprayá CIBC FirstCaribbean su kompromiso ku e merkado di Karibe Ulandes en partikular pero tambe Karibe en general.

Ela bisa ku banko su kompromiso i envolvimentu ku e merkado ta pone ku e banko ta komprondé e dinámika i e motibu pakiko empresarionan ta aktua konservativo no opstante e logronan di p.e. un presupuesto balansá i invershonnan dor di gobièrnu. Sigun e gerente general redukshon di red tape i transparensha den maneho lo kontribuí na krea un ambiente di mas konfiansa den kua e empresario ta dispuesto di hasi invershon ku ta fruktífero.

Bill Wright, Direktor di Business Banking di CIBC FirstCaribbean, a duna un bista di e desaroyo di Business Banking den region.  Sr. Wright a suprayá e kompromiso di e banko pa inkorporá lo último den teknologia pa fasilitá empresanan chikí i mediano pa hasi nan negoshi fásil na un solo punto. Gerente Korporativo, Sr. Gilson Naaldijk, a duna un splikashon di e kantidat di servisionan bankario disponibel pa empresario i doñonan di empresanan chikí i mediano na Kòrsou.  Na mes momentu ela introdusí e miembronan di e tim di Business Banking indikando ku nan ta para kla pa asistí e empresario ku su nesesidat bankario tantu di su  empresa komo personal.

Direktora di BDO, Sra. Marcia Illidge a duna un introdukshon breve di e kompania.  Seguidamente Sr. Gerd Glaudemans, Managing Partner na BDO Dutch Caribbean a duna un presentashon tokante kon krea un trayekto pa krea un empresa próspero. Sr. Glaudemans a splika kon planeá strategia kuminsando for di un análisis di e medio ambiente den kua e empresa tei operá te ku krea un trayekto empresarial eksitoso dor di stipulá metanan korekto. Sra. Sheila Marugg-Elhage, Tax Manager na BDO tambe a tene un presentashon den kua ela profundisá den e último i futuro kambionan den nos régimen fiskal ku ta importante pa empresarionan. Despues di e presentashonnan e presentenan tabatin oportunidat pa interkambiá i sigui diskutí ku e ekspertonan di CIBC FirstCaribbean i BDO Dutch Caribbean durante di un resepshon ameno.