E aña aki un biaha mas Vrienden van Verriet, e fundashon ku tin komo meta pa sostené Fundashon Verriet, ta bai tene un aktividat karitativo. Djaweps 3 di dezèmber 2015 próksimo, riba Dia Internashonal di Personanan ku un Limitashon, lo tuma lugá un ‘Business Lunch’. E lùnch aki lo ta e komienso di e kampaña ‘I AM DISABLED’. E evento aki lo tuma lugá na Renaissance Resort Curaçao, di 11:30 AM pa 14:00 PM.
Orador i entretenimentu
Durante di e lùnch señor John Leerdam, lo ta orador prinsipal. Leerdam lo elaborá riba e importansia di inklushon di personanan ku un limitashon den komunidat. Tambe lo e papia riba potensial i balor agregá di un persona ku limitashon pa e organisashon den kua e ta funshoná. Lo e para ketu riba ehèmpel di Hulanda kaminda e mes ta topa ku hopi personanan ku limitashon den e proseso laboral. Banda di esaki, pa duna e evento un toke èkstra, nos artista lokal ku rekonosementu internashonal, señor Roland ‘Ròi’ Colastica lo trese un obra teatral kòrtiku kaminda e tambe ta elaborá riba e tema di inklushon, pero di un forma artístiko. Lo tin kompañamentu musikal di señor Gino Coelho, pa duna e evento un toke spesial.
‘I AM DISABLED’
E tema di e kampaña i e lùnch ta mará na e afan di Fundashon Verriet pa ranka sali ku un programa kaminda ta brinda e oportunidat na personanan ku un desabilidat pa nan tambe ta parti di e proseso laboral. Un persona ku desabilidat tin hopi talento i abilidat i den vários kaso apesar di su limitashon mental i/òf físiko, e por ta di gran balor komo empleado di un empresa. Fundashon Verriet ta konsiente ku tin mas organisashon ta trahando riba e área aki i ku e kampaña aki e kontribuí na hasi e konsiensia spesialmente bou di empresanan, mas grandi. Ku e fondonan rekoudá lo finansiá entre otro un ‘job coach’ pa guia klientenan ku ta drenta e proseso laboral.
Bo Aporte
Bo ta keda kordialmente invitá na e evento eksklusivo aki. Karchi di entrada ta optenibel pa $199 pa persona òf $1900 pa un mesa di 10 persona. Pa reservashon di karchi por yama 736-7600 (ekstenshon 2268), 514-2510, 521-0089 òf por tuma kontakto via ‘email’ na vriendenvanverriet@gmail.com òf vriendenvanverriet@sgrgroep.org. Na momentu ku reservá karchi, Vrienden van Verriet lo sòru pa entrega di e karchinan.