HOMENAHE NA ANSELMUS ‘BOY’ DAP

WILLEMSTAD.- Durante un kombersashon entre Fundashon Bon Intenshon i Maduro & Curiel’s Bank e idea a nase pa ban duna e kompositor, músiko i kantante Anselmus ‘Boy’ Dap un homenahe. E desishon pa hasi e homenahe aki ta kai pareu ku e aña den kua Maduro & Curiel’s Bank ta pendiente pa bai selebrá su di 100 aniversario. Komo e Banko Amigu i di Pueblo pa MCB ta un honor pa por duna un di nos baluartenan musikal e homenahe ku e meresé. Pa Fundashon Bon Intenshon e homenahe pa Anselmus ‘Boy’ Dap ta bira e di dos evento kaminda e organisashon ta pone lus riba un di nos músikonan ku tabatin un trayektoria impreshonante i ku a deleitá e pueblo di Kòrsou ku su músika.

BOY DAP

Anselmus ‘Boy’ Dap a nase na Kòrsou dia 25 di òktober 1933. Lanta ku muzik komo un parti integral di su hubentut ela desaroyá i bira un músiko, kompositor i kantante ku no solamente a komponé Tumba pa kua e ta konosí pe, pero a komponé tres wals, “Amor skondí”, “Barika gel” i “Amor sin doló”  ku tekstonan sentimental ku a bira hopi konosí. Pa loke ta trata Festival di Tumba, Boy Dap a partisipá 22 biaha, ganando e korona na 10 okashon.

KONSIERTO

E homenahe pa Anselmus ‘Boy’ Dap ta tuma lugá riba djasabra, 9 di yanüari 2016 riba Plasa Brion. Pa 8’or di anochi e konsierto ta kuminsá i ta plania pa kaba pa 10’or di anochi.

ORKESTA

E orkesta ‘Co Co Gre Gre’, bou di direkshon di Gregory Colina lo presenta un repertorio ku lo kontené diferente dje éksitonan grandi di Boy Dap. E orkesta lo tin un sekshon di brass di 4 tròmpet i 4 trombon. Areglistanan ku ta trahando ku e proyekto ta Gregory Colina, Jacobo Colina, Jose ‘Uti’ Gregorio, David ‘Ronchi’ Matthew, Hershel Rosario, Arnel Salsbach i Axel Pikero. E kantantenan ku lo interpretá e kansionnan komponé pa Boy Dap lo ta Dibo Doran, Gibi Doran, Urvin ‘Luwi’ Jano, Boy Thode, Henry Bernadina, Remy Joss, Moises Ramos, Albertico ‘Tico’ Libiee, Little Leito, Amos Balentin, Rubertico ‘Tico’ Balentin i Carlos Salsbach.  Koristanan ta Niata Augusta, Verna Kastaneer, Harlianne Silvanie i Jarnise Aitatus.

INVITASHON

Un invitashon ta bai na pueblo di Kòrsou pa dia 9 di yanüari 2016 nos uni riba Plasa Brion pa disfrutá di un konsierto kaminda un dje baluartenan musikal di Kòrsou, Boy Dap, lo keda homenahiá.