E akshon boluntario di mas grandi na Kòrsou a lansa djabièrne
WILLEMSTAD —Djabièrne último, dia 23 di òktober, a lansá e di tres edishon di CURA DOET, e akshon boluntario di mas grandi na Kòrsou. Den kura di Parke Tropikal den un ambiente ameno den kompania di mas ku 150 representante di organisashonan sosial na Kòrsou a presentá e akshon pa 2016. E “cherry” riba e bolo tabata presentashon di e pelikula kòrtiku di CURA DOET pa tur presente disfrutá. Por mira e pelikula riba e FB pagina di CURA DOET i Curaçao Cares. E akshon boluntario tabata un eksito formidabel e aña aki partisipashon di 156 organisashon i 3900 boluntario ku a logra klara 184 tarea.
11 i 12 di mart 2016
Na 2016, e akshon lo tuma lugá riba 11 i 12 di mart na Aruba, Boneiru, Kòrsou, Statia, St.Maarten i Hulanda. Aña pasa mas ku 400.000 persona a partisipá na mas ku 85.000 tarea den reino riba mesun dianan. Kòrsou tambe tabatin un aña rekòrt ku partisipashon di un par di shen organisashon sosial, grupo di skout, sentronan di bario, programanan despues di skol ets. Na lansamentu djabièrne por a konstatá ku e entusiasmo ta haltu atrobe.
CURA DOET
Durante CURA DOET, organisashonnan sosial por inskribí pa realisá diferente tarea òf aktividat. Ta trata di tarea i aktividatnan serka fundashonnan, organisashonnan di deporte, skolnan i institutonan di kuido, ku ta keda pará òf no por ser organisá pa falta di hende pa yuda. Aki por pensa riba tareanan manera yudansa pa drecha vèltnan di deporte, man èkstra pa yuda durante un mèrdia di wega pa hende grandi òf personanan ku limitashon, limpiesa i renovashon pa un sentro di bario i hopi mas. Organisashonan sosial rònt Kòrsou mester di e sosten i pa nan ta un chèns pa sera konosí ku boluntarionan i kompanianan nobo. CURA DOET ta ser organisá pa Curaçao Cares i ‘Oranje Fonds’ ku sosten di Reda Sosial. Curaçao Cares ta un plataforma pa boluntario ku ta forma un brùg entre boluntario, kompania i organisashon sosial i ku tin komo meta stimulá embolbimentu sosial i aserkamentu entre suidadanonan. Curaçao Cares ta dediká na yuda amplia, reforsá i promové trabou boluntario na Kòrsou.
Inskripshon pa tarea i aktvidat
Organisashonnan i inisiativanan sosial por inskribí nan tareanan for di djasabra riba e website www.curadoet.com òf dor di tuma kontakto ku Curaçao Cares na curadoet@curacaocares.org. Esaki lo ta posibel te ku 22 di yanüari 2015. Oranje Fonds lo por otorgá un donashon te ku 1,100 florin, por ehèmpel pa regla material òf transporte. Aporte finansiero ta limitá kiermen no tarda!
Boluntarionan
Fin di desèmber 2015, tur persona, famia, grupo di amigu i kompania por inskribí i buska un aktividat spesial pa bin yuda durante e wikènt di CURA DOET. Kompanianan por sostené e akshon nashonal aki tambe dor di ofresé un servisio òf produkto ku deskuento pa realisá un aktividat. Pa skolnan, CURA DOET ta un chèns ideal pa laga hóbennan tambe sera konosí ku trabou boluntario. CURA DOET kier krea un ola di positivismo riba nos isla atrobe.