Seremonia di Premiashon di: 2015 JCI DC NATIONAL CONVENTION

WILLEMSTAD – Djasabra último 17 di òktober varios miembro di JCI i tambe senador, invitado, i invershonistanan importante den nos komunidat a pasa un ratu plasentero huntu na klousura di 2015 JCI Dutch Caribbean National Convention na Hilton Curaçao.

E evento aki ta algu ku ta tuma luga tur aña di nobo kaminda ta duna un oportunidat kada biaha pa un organisashon lokal di JCI Dutch Caribbean funhí komo anfitrion. JCI Dutch Carribean ta konsistí di JCI Aruba, JCI YALA, JCI IOBA, JCI CLIC, JIC UC, JCI YUB, JCI Live, i tambe JCI St. Maarten. Sin duda algun nos tin di rekonosé ku e tim organisatorio a hasi un bon trabou den prepará un tremendo programa di desaroyo pa tur ku a forma parti di e evento aki. E programashon tabata kargá ku evento nan manera kompetensha di diskurso i debate, kursonan di liderasgo, i elekshon di miembronan di direktiva pa JCI Dutch Caribbean pa 2016. E aña aki JCI IOBA Curaçao tabata tin e honor di por a organisá e gran aktividat aki ku ta konsistí di tres dia. E ophetivo prinsipal di e evento aki ta pa proveé informashon di balor, den transkurso di trabou duru pa yega na solushonan di kon pa logra kualke un meta pa asina por tuma akshonan konkreto ku ta krea éksito riba largo plaso i tambe pa selebra huntu 100 aña di e movementu di JCI.

JCI United Citizens of Curaçao (JCI UC) meskos ku diferente otro organisashon lokal di JCI tambe a partisipá na konferensha nashonal di 2015. JCI UC ta un organanisashon ku ta konsistí di miembronan yòn i dinámiko kla pa traha na bienestar di nos komunidat. JCI UC a sa di demostrá un imenso kresementu den e último dos añanan tras di lomba. Ta hopi remarkable kon JCI UC a sa di krese no solamente na kantidat di miembro pero mas miho ainda nan a sa di nivelá kalidat di ehekutashon di nan proyektonan.

Pa e motibu aki JCI UC ta hopi kontentu i ta yama danki pa e rekonosementu risibí durante e seremonia di premiashon djasabra último. E organisashon a risibi na tur 6 premio ku ta enserá: (1) Most outstanding local organization, (2) 100% Efficiency Program, (3) Best Local Community Empowerment Program (The Golden Voice of Tourism Youth Congress den kolaborashon ku Ofisina di Turismo Kòrsou), (4) Best Long-term Local Community Empowerment Program (Manera Mi Bos No Tin Dos iden kolaborashon kuFundashon KPEK, Biblioteka Nashonal Kòrsou, i Toastmasters International), (5) Most Outstanding NEW Member (Naesha Zunder), (6) Most Outstanding Local President (Silvetty de la Paz).

JCI UC ta masha gradesí na tur partner, kolaborador, miembro, senador, invitado, i tur ku ta afiliá na e organisashon di un forma of otro. Un danki speshal ta bai na komunidat kompletu pa e sosten durante e aña tras di lomba demostrá pa medio di partisipashon aktivo na varios proyekto, evento, i demas aktividat.