20 pais ya a konfirmá partisipashon

Willemstad—Dia 19 i 20 di òktober próksimo lo tuma lugá e Caribbean Cycling Championship 2013. Durante di un rueda di prensa na e ofisina prinsipal di Girobank, a keda anunsiá ku no ménos di 120 siklista prosedente di sigur 20 pais rònt Karibe lo partisipá na e evento deportivo aki, ku ta organisá pa Curaçaosche Wielerbond (CWB). CWB huntu ku Girobank komo patrosinadó mayó, ta trahando duru pa garantisá un evento eksitoso garantisá un kampeonato eksitoso i alabes tene Kòrsou su nòmber haltu den region. Otro kompania i instanshanan ku ta dunando aporte na e evento aki ta: Ennia, Blue Bay, Firgos, PRGV, CTM Curaçao, Vista Bike, Vidanova, Keesen Actuarissen, Zenitel, Lions Dive & Beach Resort, Securitas, Mammoet Printing, Guardian, PWC, Dasia Cycling, EWT, Coca Cola, Polar APC (ántes APNA), Uralco, Wash on Wheels i Ministerie van Defensie. E kampeonato karibense di siklismo di ruta aki ta regardá dos disiplina: E kareda kontra di oloshi, riba djasabra 19 di òktober i esun di ruta riba djadumingu 20 di òktober. Paisnan ku ya a konfirmá partisipashon ta entre otro: Martinique, Guadaloupe, Repúblika Dominikana, Puerto Rico, Belize, Guyana, Sürnam, Jamaica, Barbados, St. Kitts i Nevis, Antigua, Anguilla, St. Maarten, Bahamas, US Virgin Islands i Dominica. Señor Stephen Capella CFO & COO di Giro Bank ayera durante di e rueda di prensa, a menshoná Girobank su kompromiso ku deporte i en espesial siklismo. Capella a splika ku Girobank ta mira e frutanan di e banko su patrosinio na e deporte di siklismo i ta kontentu di por forma parti un bes mas di un magno evento deportivo manera Caribbean Cycling Championship. Aktualmente, Kòrsou ta unu dje pilarnan grandi den siklismo di Karibe i aparte di tin e di titulo kampeon Panamerikano, nos isla ta produsiendo siklistanan sumamente eksitoso den siklismo ulandes na nivel amatùr. Ademas, Kòrsou ta dominando den siklismo hubenil karibense i den kategorianan mayó. Presidente di bònt di siklismo CWB, Jopito Cijntje a afirmá ku no solamente Kòrsou lo marka pouta organisando Caribbean Cycling Championship 2013, pero lo logra un titulo sigur. Sin menshoná nan sekreto, Cijntje a bisa ku tantu riba e prueba kontra di oloshi komo esun di ruta, Kòrsou tá konkista medaya! E selekshon aktual ta den entrenamentu serio. Mayoria dje koredónan den eksterior ya ta na kas i ta entrenando ku esnan bibando akinan. Entrenadó i tékniko nashonal, Henny Bonafacia ta kontentu ke entrenamentunan. E kompetensha pues lo ta unu fuerte. E promé 6 puestonan lo klasifiká pa e siguiente Kampeonato Sentro Amerikano i di Karibe. Tur e koredónan, lo bringa pa e puestonan aki. E ruta di kontra oloshi ta tuma lugá den e bunita área di Banda Abou. Riba 19 di òktober lo start na Barber, yega Westpunt i bira bek. Un distansha di 40 km pa kabayero i 20 km pa dama. Siguiente dia, esta 20 do òktober, lo ta e gran dia pa e kompetensha di ruta di kasi 130 km. E ruta, diseñá pa CWB ta kore den kurason di Saliña i pasa via di sirkuito riba Nieuwe Haven. Pa partisipantenan maskulino esaki ta bira 18 rònchi di 7.2 kilometer i pa partisipantenan  femenino 9 rònchi di 7.2 kilometer. Girobank, huntu ku CWB i demas patrosinadònan ta manda un invitashon deportivo pa habitantenan di Kòrsou no pèrdè e gran evento aki. Lo ta un beyesa mira 120 siklista den grupo kore den e Saliña i riba Schottegatweg. Lo pone tribuna riba e ruta.