Aruba Mural Proyects ta un proyecto cu ta enfoca riba arte na e murayanan di San Nicolas. E proyecto di AMP no ta limita solamente na e murayanan. A tuma e iniciativa pa duna e Old Barber Shop un imagen nobo completamente biña. Robert Tromp director artistico di AMP ta aprecia e colaboracion di e negoshantenan y tur cu a coopera pa por a ricibi e oportunidad pa verf henter e edificio biña. Tromp ta sigui comenta cu awor e bista na inicio di caya grandi tin un bista nobo, mas limpi y artistico. “E ta duna un iniciativa positivo unda e propio “chollernan” tabata bin wak e trabounan y con limpi e area a keda. Na inicio di e proyecto di AMP nos a anuncia cu e proyecto ta bay mas leu cu e murayanan, a mira un oportunidad den e entrada di San Nicolas cu awor ta hala atencion. Nos ta sigui awor cu e edificio di ex DOOV, haciendo e bentana nan limpi, y full rond tin cosnan ta bay pasa. Esey ta “nice” di AMP, nos kier “amplifica” San Nicolas.”

Den dos dia a verf henter e edificio biña y a haci henter e area limpi. Esaki sigur a cay den bon tera specialmente pa e stacion di gasoline cu ta ubica net na banda di e edificio aki. E comerciante cu ta maneha e stacion di gasoline, Sr. Harold Faro, ta comenta cu e problematica di adictonan ambulante a disminui despues di e trabounan haci na e edificio aki. Sr. Faro ta bisa: “Nos a vocifera na hopi ocasion y na diferente instancia pa yuda nos cu e problemanan cu e edificio aki, mirando cu e chollernan a tuma over. E Old Barber Shop ta na entrada di San Nicolas y tabata un mahos bista specialmente pa e turistanan cu ta bishita nos.” A keda sumamente satisfecho na momento cu a mira un grupo di hende haci e trabounan di limpieza y verf e edificio. Sr. Faro ta sigui bisa: “E ta un alivio mirando cu e luga ta bay atras den un estado deplorabel y mahos. Tabata tin por lo menos 5 of 6 di e adictonan tabata bin keda na e edificio, nan tabata bin cu nan corchon di cama y tur nan cosnan creando asina un peliger grandi den e area. Un grupo di persona den nomber di Minister Oduber a bini y splica kico e intencion ta cu e proyecto cu awor nos por mira e inicio di dje, di cual a suavisa e problematica bastante.”

Sr. Faro ta splica cu e adictonan tabata un molester pa su clientenan. Constantemente nan tabata haci nan actonan bou di influencia cu no tabata na agrado di ningun hende. Su preocupacion tabata specialmente diahuebs ora cu tin e cantidad grandi di turista cu ta bishita San Nicolas durante Carubbian Festival. E adictonan tabata cana casi mita sunu of cu nan paña interior exponi. Awor cu nan no tin e edificio mas na nan antoho nan a bandona e area. Harold ta bisa cu e edificio biña ta un simbolo di speransa y no por warda pa mira e proyecto den su totalidad.

Proyectonan di arte por ta un forma alivia problemanan social. Sin ainda yega su cumbre ya caba AMP a demostra con por haci uzo di arte na bienestar social di un comunidad. Pa diahuebs dia 29 di october lo tin un evento pa devela e proyecto completo unda Aruba lo por gosa di un otro proyecto di arte den espacio publico.