Djabièrne último e konseho di ‘Ta prepará’ tabata kore manera un liña korá den e di tres semiario di Prevent Now! na Kòrsou, organisá pa Ennia. E seminario tabata bon bishitá. Den WTC 600 bishitante tabata sumamente interesá den e presentashonan di oradónan internashonal i lokal tokante management riba tereno di kalamidat i seguridat di tráfiko. E presentashonan alabes tabata kontené diferente tep pa siudadano, kompanía i gobièrno. Tambe e partisipantenan por a mira seis diferente demostrashon di produkto kaminda kompaníanan lokal a presentá e públiko kurioso ku nan último produktonan riba tereno di seguridat.

Na kuminsamentu di e seminario oradónan internashonal i regional manera por èhèmpel Jim Campbell, lider di e Red Alert Global Urban Search & Rescue Team, i Stacy Ann Pi Osario, direktor PODS Emergency Management Consultancy & Solutions na Trinidad i Tobago, a sa di impreshoná e públiko ku nan propio eksperiensia ku orkan, teremoto i inundashon. Nan a duna e públiko un mensahe klá: ‘Ta prepará tur ora i traha un plan ku bo ta praktika regularmente.’ Tur dos e oradónan a enfatisá e importansia di bon ekipo, training i kolaborashon estrecho entre gobièrno, mundu empresarial i siudadanonan. Lástimamente esaki no ta práktika komun den tur país.

Desaroyo positivo riba tereno di prevenshon na Kòrsou

Nelson Navarro, minister di Hustisia i Heiko de Jong, fiskal mayó na Kòrsou, a enfatisá e importansia di un enfoke integral den bario pa kombatí ladronisia i atrakonan armá na Kòrsou. De Jong a mustra un reportahe kortiku di e projekto piloto ‘Tienda di Prevenshon’ ku ta tuma lugá na Nort Santa Rosa. Pa e projekto prometedó aki – ku den futuro lo keda introdusí den diferente otro bario na Kòrsou – Ministerio Públiko ta traha huntu ku habitantenan di bario, ENNIA i kompaníanan di seguridat pa asina yega na un enfoke preventivo ku ta fortifiká e unión den bario. E projekto a wòrdu lansá durante e di dos seminario di Prevent Now! i ya kaba ta dunando resultado den e sentido ku kriminalidat den e bario di Nort Santa Rosa a baha konsiderablemente.

Elogio pa e direktor di ‘Management di riesgo i maneho di kalamidat’

Apesar di e echo ku tin e desaroyonan positivo aki, Kòrsou tin hopi kos di siña ahinda riba tereno di seguridat. Esaki a sali na klá despues di e reakshonan di e públiko presente. Riba pregunta di Gilbert Martina, senior managing director di ENNIA, ken ta di opinion ku Kòrsou ta bon prepará pa kalamidat, niun hende no a hisa man pa konfirmá esaki. Sinembargo Lesley Fer, e direktor nobo di e direktorado di management di riesgo i maneho di kalamidat, a gana admirashon di e públiko pa su vishon progresivo riba tereno di kalamidat. Su ponensia ku e gobièrno di Kòrsou mester presta mas atenshon na e prevenshon di kalamidat i na komunikashon efektivo ku su siudadanonan a resultá den un aplouso enorme di e públiko.

Ya pa tres aña kaba interkambio di konosementu riba tereno di prevenshon riba diferente nivel ta e punto sentral durante e seminarionan di Prevent Now!. Segun ENNIA, organisadó di e evento anual aki, ta sumamente importante ku siudadanonan, kompaníanan i servisionan di gobièrno ku ta bishitá e seminario, ta kompartí nan konosementu i alabes sigui ku akshonan preventivo i di preparashon.