E fondo rekoudá ta pa duna un òf mas hóben lokal mas oportunidat pa profeshonalisá den e industria di aviashon kual ta un invershon den e hóben ku segun CAP tambe lo benefisiá Kòrsou

WILLEMSTAD – E aña aki atrobe a tuma lugá e ‘CAP Golf Charity Tournament’, kual ta e torneo di gòlf karitativo di Curaçao Airport Partners, organisá pa rekoudá fondo pa un bon kousa. Den 2014 a tuma lugá e promé edishon di e torneo di gòlf ku karakter karitativo kaminda a rekoudá fondo pa Stichting Tegen Kindermishandeling (Do Blue) i CARF. E aña aki ‘CAP Golf Charity Tournament’ tabata un gran éksito atrobe. Tantu pa medio di partisipashon di sigur 35 tim di golf nashonal i internashonal, komo pa medio di donashon di montante, produkto  i servisio di kompanianan lokal, a logra rekoudá ANG60.000,- ku ta dediká na un bùrs spesífiko pa hóben lokal ku ta konsiderá un karera den mundu di aviashon i por hasi bon uso di e ‘Airport Aviation Scholarship’. “E bùrs ta un oportunidat pa nos komo CAP ofresé e studiantenan di Kòrsou e posibilidat pa bira parti di e industria di aviashon. Nos ta haña ku fasilidatnan manera un aeropuerto ta ofresé un gran variashon di oportunidatnan pa profeshonalisá, por ehèmpel den e ramo di operashon, Fire Rescue, seguridat, finansa, real estate i hopi mas. Pero prinsipalmente e industria ta habrí pa ideanan nobo i fresku. Nos ke mira e hóbennan di Kòrsou, ku segun nos opinion tin hopi potensial, pa ta parti di esaki i konsiderá aviashon komo e rumbo pa na karera, di kua nan lo piki fruta den futuro”, CEO di CAP señor Ralph Blanchard a splika durante e seremonia di premio.