Dia 15 di òktober a ser proklamá komo dia internashonal di stòki, kual ya ta 50 aña di selebrashon. Ku e stòki blanku ta referí na esun ku strepi kòrá ku blanku ku personanan ku problema ku bista ta usa.

Tur aña, Fundashon Pro Bista ta pone atenshon riba e dia aki. E aña aki Fundashon Pro Bista ta bai hasi esaki na un forma bastante pekuliar.

Hende nan ku un limitashon visual, tambe gusta rekreá por medio di hasi kompra i tin biaha asta bai sine.

Pues e aña aki un grupo di 30 kliente, huntu ku diferente trahadó i boluntario nan di Fundashon Pro Bista i nan fotógrafo ta sali i bishitá e Sentro Komersial ‘ Sambil’.

Riba e dia aki un grupo di kliente huntu ku nan ergotherapista i terapista di revalidashon ta bai inspektá pa asina konstatá kon adaptá e Sentro Komersial aki ta pa hende nan ku un limitashon visual.

Ta bai tin mas sorpresa pa e komersiante nan ku tambe ta bai kai bou di e prueba aki.

Al final di e dia aki, e kliente nan i e trahadó nan lo evaluá e dia i informá òf duna konseho na e establesementu nan bishita, pa nan por risibí ainda un grupo mas grandi na nan establesementu.

Fundashon Pro Bista ta bai informá pueblo di Kòrsou kon e aktividat aki a finalisá.